تەندروستیی هەولێر بۆ ئاڤا: تووشبووانی ئایدز لە ئارایشتگاکەی هەولێر، بەقاچاخ هاتوون

ئاڤا نیوز

پاش ئاشكرابوونی چەند تووشبوونێکی كەسانی بیانی بە نەخۆشیی گوازراوەی ئایدز، بەڕێوەبەری تەندروستیی هەولێر ڕایدەگەیەنێت، كەسانی تووشبوو بەقاچاخ هاتوونەتە هەولێر و مۆڵەتی پیشە و مۆڵەتی تەندروستیشیان نەبووە.

چیرۆكی سەرەكی: لیژنەكانی پشكنینی تەندروستی سەر بە بەڕێوەبەرایەتیی تەندروستیی هەولێر، بەدواداچوون و پشكنینیان بۆ ژمارەیەك سەنتەری جوانكاری و ئارایشتگەی شاری هەولێر كرد، دەركەوت سێ لە كارمەندانی ئەو سەنتەرانە هەڵگری ڤایرۆسی (ئێچ ئای ڤی)ـن كە بە نەخۆشی ئایدز ناسراوە.

لێدوانی فەرمی: دكتۆر دلۆڤان محەممەد، بەڕێوەبەری تەندروستیی هەولێر، تایبەت بە ئاڤا دووپاتیكردەوە، ئەو كەسە بیانیانە بەڕێگەی قاچاخ هاتوونەتە هەرێمی كوردستان، بۆیە لە سۆنگەی خەمخۆریمان بۆ سەلامەتیی گشتی، پشكنینەكانمان بەردەوام دەبێت و پڕۆسەكە سەرجەم سەنتەرەكان دەگرێتەوە، هەر سەنتەرێك كارتی تەندروستی و مۆڵەتی نەبێت، سەنتەرەكەی دادەخرێت، كەسە بیانییەكانیش ڕەوانەی وڵاتی خۆیان دەكەینەوە.

زانیاریی زیاتر: بە گوتەی بەڕێوەبەری تەندروستیی هەولێر، تووشبوون بەزۆری لە كەسانی بیانی ڕوودەدات كە بەقاچاخ هاتوونە و ئەوانەی بە دەروازەی فەرمی هاتوون سەرجەمیان پشكنینیان بۆ كراوە و پشكنینەكانیان سەلامەتە.

بەتەنیشت ئەم بابەتەوە: دكتۆر سەركار سورچی، وتەبێژی وەزارەتی تەندروستی تایبەت بە ئاڤا ڕایگەیاند، هەر بیانییەك كە لەڕێگەی فرۆكەخانە و دەروازە سنوورییەكانەوە داخیلی هەرێمی كوردستان دەبێت، لەنێو فرۆكەخانە و دەروازە سنوورییەكان، لە خاڵی پشكنینی تەندروستی سەر بە تاقیگەی ناوەندی، پشكنینی بۆ ئەنجام دەدرێت، بەمەبەستی دڵنیابوونەوە لەوەی ئاخۆ هیچ نەخۆشییەكی گوێزراوەی هەیە یاخود نا و لە زووترین كاتدا ئەنجامی پشكنینەكەی دەردەچێت، ئەگەر كەسە بیانییەكە پشكنینەكەی پۆزەتیڤ بێت واتە هەڵگری ڤایرۆسی یەكێك لە نەخۆشییە گوێزراوەكان بێت، دەستبەجێ دیپۆرت دەكرێتەوە و ڕێگە نادرێت تێكەڵ بە خەڵك بێت.

ژمارەكان وا دەڵێن: هۆبەی نەخۆشییە گوازراوە ڕەگەزییەكان سەر بە وەزارەتی تەندروستی لەماوەی 20 ساڵی ڕابردوودا، 82 تووشبووی ئایدزی تۆماركردووە كە لەو ژمارەیە؛ 67ـیان بیانی بوون و دوای ئەنجامی پشكنین دیپۆرتی وڵاتانی خۆیان كراونەتەوە.