عێراق لە ڕیزبەندی پێنجەمی ئەو وڵاتانەیە کە ڕووبەڕووی گۆڕانکاری کەشوهەوا بووەتەوە

ئاڤا نیوز

 

پێنجەم ساڵە عێراق کۆنفراس بۆ گۆڕانکاری کەشوهەوا ئەنجام دەدات. ئەمساڵ عێراق دەیەوێت سوود لە ژیریی دەستکرد وەرگرێت بۆ گۆڕانکارییەکانی کەشوهەوا. وەزارەتی کشتوکاڵی هەرێمی کوردستان بەشداری کۆنفراسەکەی کردووە.

 

وێنە گەورەکە: لە کۆنفراسی بەغدا بۆ ئاو کۆمەڵێک یاداشتنامە واژۆ کران، لەنێوان هەریەکە لە عێراق و ڕێکخراوی JIZ ـی ئەڵمانی بۆ کارکردن لەسەر دەریاچەی حلە بە 10 ملیۆن یۆرۆ. واژۆکردنی چەندین یاداشتنامەی تر لەوانە لەگەڵ سندوقی سەوزی نێودەوڵەتی و ڕێکخراوی فاو.

 

لێدوانی فەرمی: د.زێدا محەممەد، بەڕێوەبەری گشتی پلاندانان لە وەزارەتی کشتوکاڵی حکومەتی هەرێمی کوردستان بەشداری کۆنفراسەکەی کردووە و بە ئاڤا میدیای وت، هەرێمی کوردستان سەرچاوەیەکی باشی ئاوی هەیە، بەشێک لە ئاوە نێودەوڵەتییەکان بەناو هەرێمی کوردستاندا تێپەڕدەبن و بۆ ناوچەکانی عێراق دەچن، پێویستە هەرێمی ڕۆڵی هەبێت لەم پرسانە.

 

د.زێدا محەممەد باسی لەم بابەتانەش کرد:- 

 -  بە وەزارەتی کشتوکاڵی عێراقمان وتوە، هەرێمی کوردستانیش ڕووبەڕووی گۆڕانکاری کەشوهەوا بووەتەوە، بۆیە پێویستە ئەو بودجانەی بۆ گۆڕانکاری کەشوهەوا لەچوارچێوەی ڕێککەتنەکان واژۆ دەکرێن، پشکی هەرێمی کوردستانیشی تێدا بێت.

- ئەمساڵ ئێران لەسەر ئاستی باڵا بەشداری نەکردبوو، بەڵام تورکیا بە شاندێکی باڵا بەشداری کردبوو. لە پانێڵەکان دەیانوت؛ پێویستە عێراق دیاری بکات لە چیدا هەماهەنگ بین و ئۆفەرەکانتان چین؟

باکگراوند: پێنجەم ساڵە عێراق لە ڕیزبەندی وڵاتانی کاریگەر بە گۆڕانکارییەکانی کەشوهەوا لە ڕیزبەندی پێنجەمە. سەنتەری ستراتیژیی مافەکانی مرۆڤ لە عێراق دەڵێت: لە ماوەی 30 ساڵی ڕابردوودا بەهۆی گۆڕانی کەشوهەواوه عێراق نزیکەی 30٪ـی زەوی کشتوکاڵی لە دەستداوه.