نوێنەرانی 150 هەزار بازرگان و وەبەرهێنی توركیا سەردانی هەولێر دەكەن

ئاڤا نیوز

بازرگان و خاوەن كۆمپانیاكانی توركیا مەبەستیانە پەرەی زیاتر بە پەیوەندییە بازرگانییەكانیان لەگەڵ هەرێمی كوردستان بدەن و نوێنەرانی 150 هەزار كۆمپانیای توركیا ئێستا لە شاری هەولێرن و دیدار و كۆبوونەوەیان لەگەڵ خاوەنكارانی شارەكە دەبێت.

لێدوانی فەرمی: کامەران سەڵاح باجگر، جێگری سەرۆکی ژووری بازرگانی و پیشەسازی هەولێر بە ئاڤا میدیای ڕاگەیاند: شاندێكی ئەنجوومەنی هەناردەكارانی توركیا كە پێكهاتوون لە زیاتر لە 20 هاوردەكار و بازرگان و خاوەن كۆمپانیا، بە نوێنەرایەتیی 150 هەزار كۆمپانیای توركیا ئێستا بە سەردانێك لە شاری هەولێرن و سبەی لەگەڵ خاوەن كۆمپانیا و خاوەنكارەكانی شاری هەولێر كۆدەبنەوە.

- ئامانجی سەردان و كۆبوونەوەكە، زیاتركردنی قەبارەی ئاڵوگۆڕی بازرگانی و پتەوتركردنی پەیوەندییە ئابووری و بازرگانییەكانی نێوان هەرێمی كوردستان و توركیایە.

لەلایەكی دیكەوە: جێگری سەرۆکی ژووری بازرگانی و پیشەسازی ئاماژەی بە ئەوە دا كە ئێستا هەولێر بووەتە سەنتەرێكی بازرگانیی گەورە لەسەر ئاستی عێراق و ناوچەكە، بە هۆی ئارامی و ئاسایشی هەرێمی كوردستان كۆمپانیاكان ڕوو لە هەرێمی كوردستان دەكەن و وەبەرهێنان دەكەن.

قووڵتر: جگە لە پەرەپێدانی زیاتر بە ئاڵوگۆڕی بازرگانی، ژووری بازرگانی و پیشەسازیی هەولێر مەبەستییەتی هانی گەورە كۆمپانیاكان و وەبەرهێنەران بدات كە لە شاری هەولێر پڕۆژەی گەورە ئەنجام بدەن، لەبری ئەوەی كەلوپەل و پێداویستییەكان هاوردە بكرێن لە ناوخۆی هەرێمی كوردستان پڕۆژەكان دابمەزرێنن.