پەیامنێرێکی ئاڤا میدیا چەند خەڵاتێکی ڕێزلێنانی پێدەبەخشرێت

ئاڤا نیوز

 

دوا بەدوای بڵاوبوونەوەی گرتە ڤیدیۆیەکی پەیامنێرێکی ئاڤا میدیا لە کاتی کارکردندا و هەڵوێستی بەرامبەر خانمێکی بیرکۆڵ، کاردانەوەی فراوانی لێدەکەوێتەوە و لەلایەن چەند دامەزراوەیەکی فەرمی حکومەتی هەرێمی کوردستان خەڵاتی ڕێزلێنانی پێدەبەخشرێت.

 

چیرۆکی سەرەکی: شەرمین سەلمان، پەیامنێری ئاڤا میدیا لە دەڤەری بادینان، لەکاتی گواستنەوەی زانیاری لەسەر ئامادەکارییەکان بۆ بەڕێوەچوونی یادی 56 ساڵەی بە پارێزگابوونی دهۆک، ئافرەتێکی بیرکۆڵ دەچێتە لای و ئەویش هەڵوێستێکی زۆر مرۆڤ دۆستانەی لەگەڵدا دەکات، بەهۆی ئەمەوە گرتە ڤیدیۆییەکەی لە سۆشیاڵ میدیا بڵاودەبێتەوە کاردانەوەی ئەرێنی لێدەکەوێتەوە. 

 

لێدوانی فەرمی: شەرمین سەلمان باسی لەوەکرد، پێشتریش لە ئاڤا بەهدینان بەدواداچوونی بۆ دۆخی تایبەتی ئەو ئافرەتە بیرکۆڵە کردووە، بەهۆی ئەوە ماوەیەکی زۆرە لەسەر شەقامەکان دەمێنێتەوە، بە ئامانجی ئەوەی لایەنی پەیوەندیدار بەهانایەوە بچن. 

 

ئەوەی پێویستە بیزانیت: لەبەرامبەر ئەو هەڵوێستەیدا پەیامنێری ئاڤا لەلایەن؛ دەستەی سەربەخۆی مافی مرۆڤ، بەڕێوەبەرایەتی گشتیی گەشەپێدان و چاودێری کۆمەڵایەتی، پەیمانگایەکی ناحکومی دهۆک، خەڵاتی ڕێزلێنانی پێبەخشراوە، هەروەها چەندین کەسایەتیی دیکەش بە ڕاستەوخۆ و ناڕاستەوخۆ دەستخۆشی ئەو هەڵوێستەیان لە ئاڤا و پەیامنێرەکەی کردووە.