شاخەوان عەبدوڵڵا لەبارەی مووچەوە هۆشداری توند بە بەغدا دەدات؛ هەڵوێستی توندمان دەبێت

ئاڤا نیوز

جێگری سەرۆکی پەرلەمانی عێراق لەبارەی مووچەوە هۆشداری توند بە بەغدا دەدات و دەڵێت، ئەگەر بەغدا گرفت بۆ خەرجکردنی پارەی مووچە دروست بکات، هەڵوێستی توندمان دەبێت.

وێنە گەورەکە: حکومەتی هەرێمی کوردستان، هەرسێ ئەرکەکەی خۆی پەیوەست بە ناردنی پارە لەلایەن بەغداوە جێبەجێ کردووە، لەماوەی دوو هەفتەدا لیستی مووچە، میزان موراجەعە و داهاتی ناوخۆی مانگی چواری ڕادەست کردووە، ماوەتەوە سەر ئەوەی دوای تەواوبوونی وردبینی لەلیستی مووچە پارە خەرج بکرێت.

لێدوانی فەرمی: د. شاخەوان عەبدوڵڵا، جێگری سەرۆکی پەرلەمانی عێراق لە ئاڤا میدیا ڕایگەیاند: لەنووسراوێک کە دیوانی چاودێری دارایی عێراق ماوەی ڕابردوو بۆ سەرۆکوەزیران و وەزیری دارایی ناردووە لە چوار بڕگەدا باسی لە هاوکارییەکانی حکومەتی هەرێمی کوردستان کردووە کە چەندێک هاوکاربوون لەگەڵ تیمەکانی چاودێریی دارایی و گرفتیان درووست نەکردووە.

گوتیشی، "ئێمە لە کۆبوونەوە داخراوەکان لەگەڵ بەغدا زۆر بە ڕاشکاوی گوتوومانە ئەگەر بەردەوامبن لە درووستکردنی گرفت بۆ خەڵکی هەرێمی کوردستان، ئێمەش وەڵامێکی توندمان بۆیان دەبێت."