بۆ ناردنی مووچە هەرێمی کوردستان تا جەژن مۆڵەت دەداتە بەغدا

ئاڤا نیوز

 

حکومەتی هەرێمی کوردستان لەسەر ڕاگرتنی مووچە بیر لە وەرگرتنی هەڵوێستی جددی و تووند بەرامبەر حکومەتی عێراق دەکاتەوە، تەنیا یەک هەفتەش وەکو مۆڵەت دەداتە بەغدا، ئەگەر مووچە نەنێرێت دەست بە بەکارهێنانی کارتە گوشارەکانی دەکات.

وێنە گەورەکە: بڕیاری ڕاگرتنی 8 مووچەی ئەمساڵ لەلایەن وەزارەتی دارایی عێراق و محەممەد شیاع سوودانی، کاردانەوەی تووندی لە ناوخۆی کوردستان لێ کەوتووەتەوە، خەڵکی کوردستان و هەموو حیزب و لایەنە سیاسییەکان بە ئۆپۆزسیۆن و دەسەڵات و پارتی ویەکێتییەوە، گەیشتوونەتە ئەو باوەڕەی حکومەتی کوردستان لەسەر حەقە و هەموو پابەندی و ئەرکەکانی خۆی جێبەجێ کردووە، خەتای حکومەتی عێراقە مووچە نانێرێت و زووڵم لە خەڵکی کوردستان دەکات، بۆیە پێویستە هەڵوێستی تووندی بەرامبەر بگیرێتەبەر.

زانیاریی تایبەت: ئاڤا زانیویەتی جگە لە ڕوونکردنەوەی ئەمشەوی وەزارەتی دارایی و ئابووریی هەرێمی کوردستان، پەیامی سیاسیش گەیێنراوەتە بەغدا و پێیان گوتوون تا جەژن مۆڵەت هەیە، پێمان بڵێن: مووچە دەنێرن یان نا، بۆ ئەوەی ئێمەش بڕیاری کۆتایی بدەین.

ئەوەی پێویستە بیزانیت: حکومەتی هەرێمی کوردستان چوار کارتی گوشاری لەبەردەستە بەرامبەر حکومەتی عێراق بەکاری بهێنێت، پشتیوانی ئەمریکا و بەهێزی پەیوەندییەکەی لەگەڵ واشنتن کە هیچ کاتێک هێندەی ئێستا بە ڕاشکاوی پشتگیری هەرێمی کوردستانی نەکردووە، لەگەڵ بەکارهێنانی کارتەکانی ڕاگرتنی کارەبا و ئاو، کشانەوەش لە حکومەتی عێراق و بەشدارینەکردن لە هەڵبژاردنی ئەمساڵی پەرلەمانی عێراق یەکێک لە کارتە هەرە بەهێزەکان و چاوەڕوانکراویشە.

باکگراوند: وەزارەتی دارایی کوردستان بە پاساوای یاسایی جەختی کردەوە بڕیارەکەی تەیف سامی، وەزیری دارایی عێراق بۆ ڕاگرتنی مووچە نادەستووری و نایاسییە. هەروەها ڕاشیگەیاند دەبووایە  بەپێی یاسای بووجە ئەمساڵ 2025  نزیكەی 13 تریلیۆن و 334 ملیار و 576 ملیۆن دینار لەلایەن بەغداوە نێردرابا، بەڵام وەزارەتی دارایی تەنیا بڕی 4 تریلیۆن و 223 ملیار و 625 ملیۆن دیناری ناردووە، ئەوەی كە لە ئەستۆی وەزارەتی دارایی عێراق ماوەتەوە، پێویستە ئەمساڵ 9 تریلیۆن و 110 ملیار و 961 ملیۆن دینارە.