نێچیرڤان بارزانی پەیامێکی پیرۆزبایی ئاراستەی یەکێتیی نیشتمانی دەکات

ئاڤا نیوز

 

لەیادی دامەزراندی یەکێتی نیشتمانی کوردستاندا، سەرۆکی هەرێمی کوردستان پەیامێکی پیرۆزبایی ئاراستەی ئەو حیزبە دەکات.

 

چیرۆکی سەرەکی: ئەمڕۆ یەکشەممە 1-6-2025، 50 ساڵ بەسەر دامەزراندنی یەکێتیی نیشتمانی کوردستان تێپەڕ دەبێت، ئەو حیزبە لە ساڵی 1975 لەلایەن کۆمەڵێک کەسی دیارەوە لە سووریا دامەزرێنرا. 

 

پەیامی فەرمی: نێچیرڤان بارزانی، سەرۆکی هەرێمی کوردستان ڕایگەیاند: له‌ یادی 50 ساڵەی دامەزراندن و يۆبيلى زێڕينى یەکێتیی نیشتمانیی کوردستاندا، پيرۆزبايى لە سەرۆک و سەرکردایەتی و جەماوەرەکەیان دەکەم.

 

- هەر لە پەیامەکەدا هاتووە، بە ڕێزەوە خوالێخۆشبوو سەرۆک مام جەلال تاڵەبانی دامەزرێنەری یەکێتی و ئەو شەهید و تێکۆشەرانه‌ بەبیر دەهێنینەوە، کە قوربانیيان بۆ ئازادى داوه‌‌، خەبات و تێکۆشانى ئەم حزبە شایستەی ڕێز و پێزانینە.

 

- سەرۆکی هەرێمی کوردستان لە بەشێکی دیکەی پەیامەکەیدا دەڵێت؛ جەخت لەسەر ئاماده‌يى و ڕۆڵی یەکێتى لە پرۆسه‌ى سياسيى هه‌رێمى كوردستان و عێراقدا ده‌كه‌ينه‌وه‌، هیوادارین ئەم یادە ببێتە هاندەرێکی بەهێزى پته‌وکردنی یەکڕيزيى نیشتمانی و پێکەوەیی لەنێوان هەموو لایەنە سیاسییەکان و پێکهاته‌کانی کوردستاندا بۆ بەرەنگاربوونەوەی ئاڵنگارييه‌كان، بۆ کارکردنی هاوبەش له‌پێناو پاراستنی دەستکەوتەکان و مافە دەستوورییەکانی هەرێمی کوردستاندا.