ئەمریکا 200 هەزار ماستەرکارد و ڤیزەکاردی بانکەکانی عێراق بلۆک دەکات

ئاڤا نیوز

بەهۆی بەکارهێنانیان بۆ سپیکردنەوەی پارە، خەزێنەی ئەمریکا زیاتر لە 200 هەزار ماستەرکارد و ڤیزەکاردی بانکەکانی عێراق بلۆک دەکات.

وێنە گەورەکە: بەهۆی تێوەگلان لە سپیکردنەوەی پارە و کارئاسانیکردن بۆ ناردنی دۆلار بۆ ئێران و پارەدارکردنی گرووپە چەکدارەکانی نزیک لە ئێران، ئەمریکا لە دوو ساڵی ڕابردوودا سزای بەسەر زیاتر لە 30 بانقی عێراقدا سەپاندووە، یەکێک لە سزا قورسەکانیش ڕاگرتنی کارکردنی ماستەرکارد و ڤیزەکاردی ئەو بانکانە بوو لە دەرەوەی عێراق لە 1-6-2025، تەنانەت ناتوانرێت سپۆنسەری تۆڕە کۆمەڵایەتییەکانیشیان پێ بکرێت.

بڵاوکراوەی فەرمی: بەپێی ڕاپۆرتێکی ڕۆژنامەی وۆڵ ستریت جۆرناڵی ئەمریکی، لە چەند ڕۆژی ڕابردوودا گەنجینەی عێراق بەفەرمی داوای لە بانکی ناوەندیی عێراق کردووە زیاتر لە 200 هەزار ماستەرکارد و ڤیزەکارد بلۆک بکات کە ئەندامانی میلیشیا عێراقییەکان بەکاریان دەهێنن.

لێدوانە فەرمییەکان:  سێس ئایزن، وتەبێژی ماستەرکارد دەڵێت،  لە سەرەتای ئاشکرابوونی ئەم بابەتە لەگەڵ حکومەتی ئەمریکا کاریان کردووە و بەپێی پێویست هەنگاویان ناوە بۆ ڕێگریکردن لەو گرووپانەی نزیکن لە ئێران.

فلێچەر کوک، وتەبێژی ڤیزەکاردیش دەڵێت، ناوەندی کارەکانیان پابەندبوونە بە دڵنیابوون لەوەی مامەڵەکان لە تۆڕەکەیاندا یاسا پێشێل ناکەن و ڕێوشوێنی گونجاو بەرامبەریان دەگرنەبەر.

ئەوەی پێویستە بیزانیت: کاتێک لە ساڵی 2023دا  حکومەتی عێراق دەستکاری بەهای دیناری کرد بەرامبەر دۆلا و بەفەرمی نرخی هەر 100 دۆلارێکی لە 118 هەزار دینارەوە کردە 132 هەزار دینار، ناسەقامگیری لە بازاڕی دراوی عێراق دروست بوو و نرخی 100 دۆلار لە بازاڕەکان 165 هەزار دیناری تێپەڕاند، ئەمەش دەرگای بەڕووی بازرگانییەکی نوێدا کردەوە، هەزاران کەس دیناری عێراقییان دەخستە سەر دەیان و سەدان ڤیزە کارد و ماستەر کارد، لە وڵاتانی دەوروبەری عێراق بە دۆلار ڕایان دەکێشا، دواتر حەواڵەی عێراقیان دەکردەوە و لە بازاڕ بە قازانج دەیانفرۆشتەوە، بەمەش بەردەوام دۆلار لە عێراق زیادی دەکرد، خەزێنەی ئەمریکاش پێیوایە "ئەم پارەیە بۆ ئێران نێرداوە".

ژمارەکان وادەڵێن: لە سەرەتای ساڵی 2023 تەنیا 50 ملیۆن مامەڵەی دەرەکی بە ماستەرکارد و ڤیزەکاردەوە کراوە، بەڵام مانگی چواری هەمان ساڵ قەبارەی مامەڵە دەرەکییەکان گەیشتووەتە زیاتر لە یەک ملیار و 500 هەزار دۆلار، بەپێی ڕۆژنامەی وۆڵ ستریت جۆرناڵ لە شەوێکدا بە ڕێژەی "2900%"زیادی کردووە.