هێنانی گۆشتی سوور بۆ دهۆک سنووردار دەکرێت

ئاڤا نیوز

بۆ ڕێگری لە بڵاوبوونەوەی تای خوێنبەربوون، ڤێرتێرنەری دهۆک بڕیاریداوە بە هەموو شێوەیەک هێنانی گۆشتی سوور لە پارێزگاکانی ناوەڕاست و خوارووی عێراق قەدەغە بکات و لە پارێزگاکانی هەرێمی کوردستانیش سنوورداری دەکات.

وێنە گەورەکە: تای خوێنبەربوون، نەخۆشییەکی ڤایرۆسییە لە ڕێگای ئاژەڵەوە بۆ مرۆڤ دەگوازرێتەوە، بەگوێرەی ئاماری وەزارەتی تەندروستی تا ئێستا پێنج حاڵەتی تووشبوون بەو نەخۆشییە لە هەرێمی کوردستان تۆمار کراوە و یەکێکیان گیانی لەدەستداوە، دواترین تووشبوو لە ئیدارەی سەربەخۆی زاخۆ بوو.

لێدوانی فەرمی: د. نیشتمان عارف، بەڕێوەبەری ڤێرتێرنەری دهۆک بە ئاڤا میدیای وت، دەمێکە بڕیاری هێنانی گۆشتی ئاژەڵمان لە پارێزگاکانی ناوەڕاست و خوارووی عێراق قەدەغە کردووە، بۆ ناوخۆش هەر گۆشتێک لە پارێزگاکانی هەولێر و سلێمانی بهێنرێتە ناو دهۆک پێویستە بە نووسراوی فەرمی بێت و سەرچاوەکەی دیار بێت و پشکنینی بۆ کرابێت.

زانیاریی زیاتر: "لە بازاڕەکانی گۆشتفرۆشی دهۆک ڕێگە بە فرۆشتنی گۆشتی وردکراو (قیمە) نادرێت، ئەگەر کڕیارێک بیەوێت گۆشتەکە دەستنیشان دەکات و گۆشتفرۆشەکە بۆی دەکات بە قیمە" د. نیشتمان عارف وا دەڵێت.

بۆچی گرنگە: ڕێکارەکانی خۆپارێزی وا دەکات تای خوێنبەربوون کۆنتڕۆڵ بکرێت، چونکە نەخۆشییەکی ڤایرۆسی بکوژە و مەترسی لەسەر ژیانی هاونیشتمانیان دروست دەکات، لە پارێزگاکانی دیکەی عێراق سەروو 100 حاڵەتی تووشبوو تۆمار کراون.