ئەندامانی حەشدی شەعبی کارتی دەنگدان بەزۆر لەخەڵک وەردەگرن

ئاڤا نیوز

ژمارەیەک ئەندامی سەر بە هێزەکانی حەشدی شەعبی، لەژێر گوشار کارتی دەنگدان لە خەڵک وەردەگرن، بۆ ئەو مەبەستەش ژمارەیەک لەو  ئەندامانەی حەشد دەستگیر دەکرێن.

وێنە گەورەکە: بڕیارە 11-11-2025، هەڵبژاردنی خولی شەشەمی ئەنجوومەنی نوێنەرانی عێراق بکرێت، تاوەکو دێت گومانەکان لەسەر پاکیی و بێگەردی هەڵبژاردنەکان زیاتر دەبن. هاوکات باس لە کڕینی دەنگ و چاوترساندنی خەڵک دەکرێت.

ڕاگەیێنراوی فەرمی: بەگوێرەی ڕاگەیێنراوێکی بەرێوەبەرایەتیی گشتیی ئاسایشی حەشدی شەعبی، ژمارەیەک لە کارمەندانی خۆیان دەستگیر کردووە. ئەمەش دوای ئەوەی چەند سکاڵایەکیان بەدەست گەیشتووە سەبارەت بەوەی هەندێک کەس ناوی حەشدیان بۆ مەرامی هەڵبژاردن و فشارخستنە سەر هاووڵاتیان بۆ وەرگرتنی کارتی دەنگدانیان بەکارهێناوە.

بەگوێرەی ڕاگەیێنراوەکە، ئەم هەنگاوە لەسەر فەرمانی فەرماندەی گشتیی هێزە چەکدارەکان و لەژێر سەرپەرشتی سەرۆکی دەستەی حەشدی شەعبی ئەنجام دراوە. بەرێوەبەرایەتییەکە دەستی بە گەڕان و پشکنینی چڕی مەیدانی کردووە و دوای وردبینی و بەدواداچوون، ژمارەیەک گومانلێکراو دەستگیرکراون.

ئەوەی لەوبارەیەوە دەگوترێت: پێشتر سەرکردەیەکی سوننەکانی عێراق ڕایگەیاندبوو، مەترسییان هەیە کڕینی دەنگ و چاو ترساندنی خەڵک بۆ بەدەستهێنانی دەنگ بەشێوەیەکی نایاسایی، لەم بابەتەشدا پەنجەی تۆمەت بۆ سەرکردەکانی "حەشدی شەعبی" درێژ دەکرێت.

لەلایەکی دیکەوە: پێشتر کۆمیسیۆنی باڵای سەربەخۆی هەڵبژاردنەکانی عێراق بە ئاڤا میدیای ڕاگەیاندبوو، هەر کاندید و لایەنێک لە هەڵبژاردنەکان دەنگ بکڕێت، ڕووبەڕووی یاسا دەکرێتەوە و لە کاندیدبوون و کێبرکێی هەڵبژاردن دووردەخرێتەوە.