باڵیۆزانی یەکێتی ئەوروپا بۆ سوودانی: کێشەکانتان لەگەڵ هەولێر چارەسەر بکەن

ئاڤا نیوز

باڵیۆزانی یەکێتیی ئەوروپا لە عێراق و باڵیۆزانی وڵاتانی ئەندامی هەمیشەیی لە ئەنجوومەنی ئاسایشی نێودەوڵەتی جەخت لە پشتیوانیی سیاسەتی حکومەتی عێراق بۆ چارەسەرکردنی کێشە ناوخۆییەکان و مامەڵەکردن لەگەڵ دۆسیە کارگێڕییەکانی نێوان حکومەتی فیدراڵی و حکومەتی هەرێمی کوردستان دەکەنەوە.

چیرۆکی سەرەکی: چوارشەممە 2025-6-11، محەممەد شیاع سوودانی، سەرۆکوەزیرانی عێراق لە بەغدا لەگەڵ باڵیۆزانی یەکێتیی ئەوروپا لە عێراق و باڵیۆزانی وڵاتانی ئەندامی هەمیشەیی لە ئەنجوومەنی ئاسایشی نێودەوڵەتی کۆبووەوە.

ڕاگەیێنراوی فەرمی: بەگوێرەی ڕاگەیێنراوی نووسینگەی سەرۆکوەزیرانی عێراق، لە میانی کۆبوونەوەکەدا، سوودانی جەختی لە گرنگیی هاوبەشیی نێوان عێراق و وڵاتانی دۆست، بەتایبەتی وڵاتانی یەکێتیی ئەوروپا و وڵاتانی ئەندامی هەمیشەیی لە ئەنجوومەنی ئاسایشی نێودەوڵەتی کردەوە.

لە هەمان کاتدا: سوودانی ڕوونیکردەوە کە حکومەت بەپێی ڕێڕەوە یاسایی و دەستوورییەکان بە دادپەروەری و یەکسانی بۆ هەموو هاووڵاتیان مامەڵە لەگەڵ دۆسیە ناوخۆییەکان دەکات.

لەلایەکی دیکەوە: باڵیۆزان ستایشی ڕۆڵی هەرێمی و نێودەوڵەتیی عێراقیان لە ناوچەکەدا کرد و جەختیان لە پشتیوانیی سیاسەتی حکومەتی عێراق کردەوە بۆ چارەسەرکردنی کێشە ناوخۆییەکان و مامەڵەکردن لەگەڵ دۆسیە کارگێڕییەکانی نێوان حکومەتی فیدراڵی و حکومەتی هەرێمی کوردستان، هاوکات هەنگاوەکان بەرەو بەهێزکردنی مافی کەمینەکان و دابینکردنی ژیانێکی شایستە و چەسپاندنی ئاشتیی کۆمەڵایەتیی بەردەوام و ئاماژەیان بە خواستی ئەوروپا کرد بۆ فراوانکردنی هاریکاریی ئابووری و بازرگانی لەگەڵ عێراقدا.

ئەوەی پێویستە بیزانیت: کۆبوونەوەی سوودانی و باڵیۆزانی یەکێتیی ئەوروپا و وڵاتانی ئەندام لە ئەنجوومەنی ئاسایشی نێودەوڵەتیی لە کاتێکدایە دوێنێ سێشەممە ئەنجوومەنی ئاسایشی نەتەوەیەکگرتووەکان لەسەر ماف و قووتی هاووڵاتیانی هەرێمی کوردستان و دۆخی عێراق کۆبوویەوە و داوای کرد، پرسەکانی نێوان هەرێمی کوردستان و عێراق بەپێی دەستوور یەکلایی بکرێنەوە.