تووشبوون و گیانلەدەستدان بە تای خوێببەربوون لە عێراق بەرز دەبێتەوە

ئاڤا نیوز

تا دێت ئامارەکانی تووشبوون و گیانلەدەستدان بە تای خوێنەبەربوون لە پارێزگاکانی عێراق بەرزتر دەبنەوە، زۆرترین تووشبووەکانیش لە پارێزگای زیقارن. وەزارەتی تەندروستیش داوای سنووردارکردنی لەوەڕاندن و سەربڕینی هەڕەمەکی دەکات.

وێنە گەورەکە: نەخۆشی تای خوێنبەربوون کە لە ئاژەڵەوە دەگوازرێتەوە بۆ مرۆڤ، لە سەرەتای ئەمساڵەوە لە شارەکانی ناوەڕاست و باشووری عێراق بە شێوەیەکی بەربڵاو بڵاوبووەتەوە.

لێدوانی فەرمی: سەیف ئەلبەدر، وتەبێژی فەرمیی وەزارەتی تەندروستیی عێراق، بە ئاژانسی هەواڵی عێراقی ڕاگەیاند: لە سەرەتای ئەمساڵەوە 123 حاڵەتی پشتڕاستکراوەی تووشبوون بە تای خوێنبەربوون تۆمارکراوە، لەو ژمارەیە تاوەکو ئێستا 19 کەس گیانیان لەدەستداوە.

داواکاری فەرمی: وتەبێژی وەزارەتەکە داوا لەلایەنە ئەمنییەکان دەکات ڕێکاری پێویست بگرنەبەر بۆ سنووردارکردنی سەربڕین و لەوەڕاندنی هەڕەمەکی و مامەڵەکردن بە مەڕوماڵاتەوە لە دەرەوەی چوارچێوە یاساییەکان، بەهۆی ئەو هەڕەشەیەی دروستی دەکات بۆ گواستنەوەی نەخۆشییە گوازراوەکان، لە سەرووی هەمووشیانەوە تای خوێنبەربوون.

ژمارەکان وادەڵێن: ژمارەی تووشبوون و مردن بە پەتای خوێنبەربوون بەگوێرەی پارێزگاکان:

زیقار: 36 تووشبوون و یەک مردن.
بەغدا (ڕەسافە): 14 تووشبوون و پێنج مردن.
واست: 15 تووشبوون و دوو مردن.
موسەننا: هەشت تووشبوون و دوو مردن.
مەیسان: هەشت تووشبوون.
نەینەوا: حەوت تووشبوون.
کەرکووک: پێنج تووشبوون و چوار مردن.
بەسرە: هەشت تووشبوون.
دیالە: پێنج تووشبوون و یەک مردن.
بەغدا (کەرخ): چوار تووشبوون.
دیوانیە: سێ تووشبوون.
دهۆک: سێ تووشبوون و یەک مردن.
بابل: دوو تووشبوون و یەک مردن.
هەر یەکە لەپارێزگاکانی هەولێر، سلێمانی، ئەنبار، کەربەلا و نەجەف یەک تووشبوون.

ئەوەی پێویستە بیزانیت: هەر بەگوێرەی ئامارەکانی وەزارەتی تەندروستی تەنیا لە ماوەی یەک هەفتەدا 16 تووشبووی نوێ و سێ گیانلەدەستدان تۆمارکراون.

باکگراوند: تای خوێنبەربوون بە یەکێک لە نەخۆشییە ڤایرۆسییە مەترسیدارەکان دادەنرێت کە دەبێتە هۆی خوێنبەربوونی ناوەکیی تووند و تێکچوونی فرمانی بۆرییەکانی خوێن. زۆرجاریش لە ڕێگەی مێرووی "گەنە" یان بەرکەوتن لەگەڵ خوێن و دەردراوەکانی ئاژەڵی تووشبووەوە دەگوازرێتەوە.