مەشعان جبووری نهێنییەک لەبارەی سەرۆکی دادگەی فیدراڵی ئاشکرا دەکات

ئاڤا نیوز

 

مەشعان جبووری، کەسایەتیی سیاسیی عێراقی دەڵێت، لەلایەن سەرۆکی دادگەی فیدراڵییەوە هەڕەشەی لێکرابوو کە ئەندام پەرلەمانێتییەکەی هەڵدەوەشێنرێتەوە، ئەگەر لە هاوپەیمانیی سێقۆڵی نەکشێتەوە. 

 

ئەوەی پێویستە بیزانیت: هاوپەیمانێتیی سێقوڵی لەنێوان ڕەوتی سەدر، پارتی دیموکراتی کوردستان و هاوپەیمانیی سیادە لە دوای هەڵبژاردنی ڕابردوو پێکهێنرابوو.

 

لێدوانی فەرمی: مەشعان جبووری، یەکێک لە سیاسییە دیارەکانی سوننەیە لە عێراق، لە بەرنامەیەکی تەلەڤزیۆنیدا دەڵێت: "جاسم محەممەد عەبوود، سەرۆکی دادگەی فیدراڵی پێی گوتووە ئەگەر لە هاوپەیمانییە سێقۆڵییەکە نەکشێیتەوە، ئەوا ئەندامیێتیت لە ئەنجوومەنی نوێنەرانی عێراق هەڵدەوەشێنمەوە".

 

وێنە گەورەکە: لە ماوەی ڕابردوودا چەندین جار تۆمەت ئاراستەی دادگەی فیدراڵی کراوە، کە دادگەیەکە بۆ مەبەستی سیاسی بەکار دەهێنرێت و لایەنگیری دەکات.

 

زانیاریی زیاتر: لە مانگی ئایاری 2022 دادگەی فیدراڵی، ئەندامێتیی مەشعان جبووری لە ئەنجوومەنی نوێنەرانی عێراق هەڵوەشاندەوە، بە تۆمەتی ساختەکردنی بڕوانامەی "بەکالۆریۆس" لە سووریا.