وەزارەتی دارایی کوردستان ئامادەکاری بۆ ناردنی لیستی مووچەی مانگی شەش دەکات

ئاڤا نیوز

وەزارەتی دارایی و ئابووریی حکومەتی هەرێمی کوردستان ئامادەکاری دەکات کە لیستی مووچەی مانگی شەشی مووچەخۆرانی کوردستان لە کۆتایی ئەم هەفتەیە تەواو بکات و لەسەرەتای هەفتەی داهاتوو ڕەوانەی بەغدای دەکات.

وێنە گەورەکە: هەرچەندە تەیف سامی، وەزیری دارایی عێراق ڕایگەیاندووە کە چیتر مووچەی مووچەخۆرانی هەرێمی کوردستان بە بیانووی تەواوبوونی پشکەکەی نانێرێت، بەڵام حکومەتی هەرێمی کوردستان ئەرک و پابەندییەکانی خۆی بەرامبەر بە حکومەتی فیدراڵ جێبەجێ دەکات، یەکێک لەوانە ناردنی لیستی مووچەی مانگی شەشە.

لێدوانی فەرمی: سەرچاوەیەک لە وەزارەتی دارایی و ئابووریی هەرێمی کوردستان بە ئاڤای گوت 22ی مانگ کە دەکاتە یەکشەممەی داهاتوو لیستی مووچە ڕەوانەی بەغدا دەکەن.

لەلایەکی دیکەوە: وەزارەتی دارایی و ئابووریی هەرێمی کوردستان دەستی بە ئامادەکردنی لیستی مووچەی مانگی شەش کردووە. هاوکات تاوەکو ئێستا وەزارەتی ڕۆشنبیری و لاوان و وەزارەتی کاروباری شەهیدان و ئەنفالکراوان لیستی مووچەی مانگی شەشیان ئامادەکردووە.

 چاوەڕوان دەکرێت تاوەکو کۆتایی ئەم هەفتەیە لیستی مووچەی مانگی شەش تەواو بکرێت، بۆ ئەم مەبەستەش سەرجەم وەزارەت و دەستەکان ئاگادارکراونەتەوە کە دەبێت تاوەکو 20ی مانگ لیستی مووچە ئامادە بکەن.

ئەوەی پێویستە بیزانیت: بڕیارە دادگای فیدراڵیی عێراق بەزووترین کات لەبارەی مووچە کۆببێتەوە و پرسەکە لەنێوان هەولێر و بەغدا یەکلایی بکاتەوە.