تووشبوویەکی نوێی تای خوێنبەربوون لە سلێمانی دەستنیشان کرا

ئاڤا نیوز

 

وەزارەتی تەندروستی حکومەتی هەرێمی کوردستان، تووشبوونی پیاوێکی تەمەن 41 ساڵەی بە تای خوێنبەربوون ڕاگەیاند و ئێستا لە نەخۆشخانە چارەسەری وەردەگرێت.

وێنە گەورەکە: هەفتەیەکە جەژنی قوربان تێپەڕیووە. بەر لە جەژن وەزارەتی تەندروستی ڕێنمایی بڵاوکردەوە کە پێویستە قوربانی و کوشتنەوەی ئاژەڵ تەنیا لە سەربڕخانەکان ئەنجام بدرێت.

ڕاگەیێنراوی فەرمی: وەزارەتی تەندروستی حکومەتی هەرێمی کوردستان ڕایگەیاند، حاڵەتێکی نوێی تای خوێنبەربوون ڕادەگەیەنین، ئەویش پیاوێکی دانیشتووی سلێمانییە لە گەڕەکی چوارچرا، لە ڕێگەی سەربڕینی چەندین ئاژەڵ و بەرکەوتنی لەگەڵ ئاژەڵی تووشبوو، دووچاری ڤایرۆسەکە بووە.

وەزارەتی تەندروستی ئەوەشی ڕاگەیاندووە، نەخۆشەکە لەژێر چاودێری پزیشکییە و باری تەندروستی جێگیرە.

ژمارەکان وا دەڵێن: بەپێی ئامارەکانی وەزارەتی تەندروستی لەماوەی دوو مانگی ڕابردوودا شەش حاڵەتی تای خوێنبەربوون دەستنیشانکراون و یەکێکیش بەو هۆیەوە گیانی لەدەستداوە.

باکگراوند: تای خوێنبەربوون یەکێکە لە نەخۆشییە ڤایرۆسییە درمە کوشندەکان کە بۆ یەکەمین جار لە ساڵی 1944 لە نیمچە دوورگەی کرایمییا لە ڕۆژهەڵاتی ئەورووپا سەریهەڵدا، بەهۆی گەنەی ئاژەڵەوە بۆ مرۆڤ دەگوازرێتەوە.