عەبدولحەكیم خەسرۆ: شەڕ كاریگەری و مەترسی لەسەر ژینگەی هەرێمی كوردستان نەبووە

ئاڤا نیوز

سەرۆکی دەستەی پاراستن و چاككردنى ژینگە، بە بەشداری نوێنەری وەزارەتەكانی ناوخۆ، خوێندنی باڵا و توێژینەوەی زانستی، گواستنەوە و گەیاندن و تەندروستی، پرسی ماددەی تیشكاوەری، كاریگەریی و مەترسییەكانی لەسەر هەرێمی كوردستان تاوتوێ دەكات.

چیرۆكی سەرەكی: عه‌بدولحه‌کیم خه‌سرۆ، سەرۆکی دەستەی پاراستن و چاککردنی ژینگە، به ئامادەبوونی نوێنەرانی وەزارەتی ناوخۆ، خوێندنی باڵا و توێژینەوەی زانستی، گواستنەوە و گەیاندن و تەندروستی، سەرپەرشتيی کۆبوونەوەیەکی فراوانی كرد تایبەت بە ماددەی تیشکاوەری و كاریگەرییەكانی لەسەر ژینگە و سەلامەتیی گشتی.

بۆچی گرنگە: لە كۆبوونەوەكە، هەڵسەنگاندن بۆ بارودۆخی ژینگەیی كرا لە چوارچێوەی ئامادەکاری بۆ هەر پێشهاتێکی نەخوازراو و لێكه‌وته‌كانى ئەو گۆڕانکاری و شەڕ و ئاڵۆزییەی ڕووی لە ناوچەکە کردووە، بەپشتبەستن بە ئامێرەکانی سیستمی ئاگادارکردنەوەی پێشوەختە کە لەهەموو شارەکانی عێراق، بە هەرێمی کوردستانیشەوە دانراون.

مەترسی پێشبینیكراو: بەهۆی بەئامانجگرتنی دامەزراوە پیشەسازییەكان بەتایبەت ئەوانەی تایبەتن بە پیتاندنی یۆرانیۆم و پەرەپێدانی تەكنەلۆژیای پەیوەست بەم پیشەسازییە، مەترسی بڵاوبوونەوەی ماددەی تیشكدەرەكان لە هەوادا هەیە كە كاریگەریی ترسناك و نەرێنی لەسەر ژینگە و سەلامەتیی دانیشتووان دروست دەكات.

خاڵی ئەرێنی: دوای هەڵسەنگاندنی بارودۆخە ژینگەییەكان و توێژینەوەی ورد لەسەر كەشوهەوا، دەركەوت تا ئێستا شەڕ و پێكدادانەكانی ناوچەكە، هیچ کاریگەری و مەترسیيەکی لەسەر هەرێمی کوردستان نەبووە.