کەشێکی "بەهارە" بەڕێوەیە و پلەکانی گەرما دادەبەزن

ئاڤا نیوز

پێشبینی دەکرێت عێراق لە سەرەتای مانگی تەممووزەوە بۆ ماوەی هەفتەیەک، ڕووبەڕووی دابەزینێکی بەرچاوی پلەکانی گەرما و کەشێکی نامۆ ببێتەوە، کە بە "بەهارە" وەسف کراوە، ئەمەش بەهۆی کاریگەریی نزمەپاڵەپەستۆیەکی بەهێزەوەیە کە ناوەندەکەی لە تورکیایە.

 

ئەوەی پێشبینی دەکرێت؛ بەپێی نەخشەکانی کەشوهەوا، سەرەڕای ئەوەی کاریگەریی سەرەکیی نزمەپاڵەپەستۆکە لەسەر تورکیایە، شارەزایان هۆشداری دەدەن دەسەڵاتە خۆجێییەکانی عێراق، کە پێویستە ئاستی ئامادەباشی بەرز بکەنەوە، چونکە ڕۆژانی داهاتوو کەشێکی "توند و نامۆ"ـی ئەم کاتەی ساڵیان لەگەڵ خۆیاندا هەڵگرتووە.

 

ئەوەی پێویستە بیزانیت: کاریگەریی ئەم بارودۆخە لەسەر عێراق بەشێوەی دابەزینی پلەکانی گەرما دەردەکەوێت، بەجۆرێک کە هەفتەی یەکەمی مانگی تەممووز کەشێکی فێنکتر و خۆشتری دەبێت، ئەمەش دۆخێکی دەگمەنە بۆ ئەم مانگە کە بە گەرمترین مانگی ساڵ دادەنرێت.

 

هۆکارە زانراوەکان: ئەم گۆڕانکارییە لە ئەنجامی دروستبوونی نزمەپاڵەپەستۆیەکی قووڵە لە ڕۆژئاوای تورکیا، کە دەبێتە هۆی بارانێکی بەخوڕ، لافاو و تەرزەبارین لەو وڵاتەدا. هەرچەندە پێشبینیی بارانبارین لە عێراقدا کەمە، بەڵام کاریگەریی لاوەکیی ئەم سیستمە کەشییە بە دابەزینی پلەکانی گەرما لەسەر ناوچەکانی عێراقیش هەستی پێدەکرێت.