شاندێكی عێراق بۆ پرسی نەوت و ناردنی مووچە گەیشتە هەولێر

ئاڤا نیوز

کەمێک پێش ئێستا شاندێکی تەکنیکی حکومەتی عێراق بۆ گفتوگۆکردن لەبارەی مووچە و هەناردەکردنەوەی نەوت گەیشتە هەولێر، هاتنی شاندە باڵا و بڕیاربەدەستەکەش دەکەوێتە ڕۆژانی داهاتوو.

ئەوەی ئێستا ڕوودەدات: کاتژمێر 6:00ی ئێوارەی ئەمڕۆ شاندێكی تەكنیكی حکومەتی عێراق لەبارەی چارەسەرکردنی کێشەی مووچە و هەناردەکردنەوەی نەوت گەیشتە هەولێر. سەردانی شاندە باڵاکەش بۆ یەكلاكردنەوەی هەردوو پرسەکە، مووچە و نەوت دەکەوێتە هەفتەی داهاتوو.

زانیاریی بەدەستهاتوو: ئاڤا زانیویەتی، شاندەکە تەكنیكییە و پێكهاتووە لە نوێنەرانی ئەنجوومەنی باڵای ئابووریی عێراق، بریكاری وەزارەتی نەوتی عێراق، دیوانی چاودێری دارایی عێراق، لەگەڵ نوێنەرانی هەردوو كۆمپانیای سۆمۆ و كۆمپانیای نەوتی باكوور.

زانیاریی پەیامنێر: عوبێد هەرکی، پەیامنێری ئاڤا میدیا لە سەرچاوەیەكی باڵاوە زانیاریی بەدەست گەیشتووە، شاندەکە هەر ئەمشەو لەگەڵ لایەنە پەیوەندیدارەکانی حکومەتی هەرێمی کوردستان کۆدەبنەوە، نوێنەرانی ئەنجوومەنی وەزیران، وەزارەتی دارایی و ئابووریی، سامانە سروشتییەكان و دیوانی چاودێری دارایی لە کۆبوونەوەکان بەشدار دەبن.

زانیاریی زیاتر: شاندەکە هاتوون ئامادەکاری بکەن بۆ ڕێککەوتن لەسەر چارەسەرکردنی کێشەی مووچە و هەناردەکردنەوەی نەوتی کوردستان. هاوکات ئەو شاندە ئامادەکاری دەکەن بۆ کۆبوونەوەی شاندە باڵاکان.

ئەوەی پێویستە بزانیت: تاوەکو ئێستاش هاتنی شاندە باڵاکە بەڕوونی دیارنییە، ئاڤا لە چەند سەرچاوەیەکی ئاگاداری پرسی، یەکێک لە سەرچاوەکان، وتی تاوەکو وادەی هاتنی شاندەکە دیارنییە، ڕەنگە سبەی بێت، یان دووسبەی یان دواتر.

سەرچاوەیەکی دیکەش لە وەزارەتی دارایی کوردستان بە ئاڤای وت، هاتنی شاندەکە دەکەوێتە ڕۆژی دووشەممەی هەفتەی داهاتوو.