شاندی دووەمی عێراق بۆ یەکلاکردنەوەی کێشەی مووچە دێتە هەولێر

ئاڤا نیوز

 

بڕیارە لە ناوەڕاستی ئەم هەفتەیە شاندی دووەمی بەغدا بگاتە هەرێمی کوردستان کە مەبەست لێی دۆزینەوەی چارەسەرێکە بۆ کێشەی مووچەی فەرمانبەرانی هەرێمی کوردستان.

 

وێنە گەورەکە: ئێوارەی ڕۆژی پێنجشەممە، شاندێکی تەکنیکی لە بەغداوە گەیشتنە هەرێمی کوردستان بۆ کۆبوونەوە لەگەڵ شاندی پەیوەندیداری هەرێمی کوردستان بۆ چارەسەرکردنی کێشەی مووچە و هەناردەکردنەوەی نەوتی هەرێمی کوردستان، بەپێی زانیارییەکان ئەو دانیشتنانەی کراون، ئەرێنی بوون، بەتایبەت باسی ئەوە کراوە کۆمپانیا نەوتییەکان ڕازی بکرێن نەوت هەناردە بکەنەوە، تێڕوانینی هەردوولا ئەرێنی بووە و لەیەک نزیکن.

 

زانیاریی پەیامنێر: عوبەید بەشار، پەیامێری ئاڤا لە زاری سەرچاوەیەکی ئاگادارەوە ڕایگەیاند، بڕیار وایە لە هەفتەیە شاندێکی باڵای سیاسی و حکومی بگەنە هەولێر، گفتوگۆ لەسەر کێشەکانی نێوان هەرێمی کوردستان و عێراق دەکەن و بڕیار لەسەر مووچەی فەرمانبەران و هەناردەکردنەوەی نەوتی هەرێمی کوردستان دەدەن.

 

لەلایەکی دیکەوە: پێگەی (بەغداد لیوم) لە زاری سەرچاوەیەك بڵاویكردەوە، وابڕیارە شاندێکی بڕیاردەر بگاتە هەرێمی كوردستان كە توانای ئەنجامدانی ڕێككەوتنی كۆتایی هەیە لە بارەی مووچە و هەناردەكردنەوەی نەوتی هەرێمی كوردستان.

 

زانیاریی زیاتر: پێگە عێراقیەكە پێكهاتەی شاندە عێراقییەكەی ئاشكرا نەكردووە، بەڵام ئاماژەی بەوەكردووە، شاندێکی فراوان و بڕیاردەری حكومەتی عێراق دەبن، وابڕیارە لەگەڵ سەرۆکوەزیران مەسرور بارزانی و ئاوات شێخ جەناب، وەزیری دارایی و وەزیری سامانە سرووشتیەكان كۆببنەوە و بڕیاری یەكلاكەرەوە لەبارەی مووچە و هەناردەكردنی نەوت دەدەن.

 

ئەوەی پێویستە بیزانیت: ڕۆژی 25-6 سەرۆکوەزیران مەسرور بارزانی، لە کۆنگرەیەکی ڕۆژنامەوانی ڕایگەیاند، لەم یەک دوو ڕۆژە شاندێکی بڕیاربەدەستی بەغدا دێتە هەرێمی کوردستان بۆ ڕێککەوتن لەسەر مووچە و هەناردەکردنەوەی نەوت.

 

پێشتر چی ڕوویدا: ڕۆژی پێنجشەممە شاندەکە تەكنیكییە گەیشتنە هەولێر، کە پێكهاتبوون لە نوێنەرانی ئەنجوومەنی باڵای ئابووریی عێراق، بریكاری وەزارەتی نەوتی عێراق، دیوانی چاودێریی دارایی عێراق، لەگەڵ نوێنەرانی هەردوو كۆمپانیای سۆمۆ و كۆمپانیای نەوتی باكوور.