بە بڕی پێنج ملیۆن دۆلار نەخۆشخانەیەكی دەروونی لە هەولێر دروست دەكرێت

ئاڤا نیوز

لە شاری هەولێر، نەخۆشخانەیەكی مۆدێرنی تایبەت بە نەخۆشانی دەروونی دروست دەكرێت و تێچووی دروستكردنەكەیشی نزیكەی لە پێنج ملیۆن دۆلار.

وێنە گەورەكە: لە شاری هەولێر تەنیا یەك نەخۆشخانەی دەروونی هەیە باڵەخانە و كەلوپەل و پێداویستییەكانی وەك پێویست نین، هەروەها بەشی ئافرەتانیشی نییە، بۆیە بە ئەگەر نەخۆشێكی ئافرەت هەبێت دەبردرێت بۆ نەخۆشخانەكانی دەروونی لە سلێمانی و دهۆك، بە دروستكردنی نەخۆشخانەیەكی مۆدێرنی دەروونی لە شاری هەولێر، دانیشتووانی شارەكە ئەو گرفتەیان نامێنێت.

لێدوانی فەرمی: ئومێد خۆشناو، پارێزگاری هەولێر لە كۆنفڕانسێكی ڕۆژنامەوانیدا ڕایگەیاند: ڕووبەری ئەو زەوییەی نەخۆشخانەكەی لەسەر دروست دەكرێت، سی هەزار و 500 مەترە و دەكەوێتە سەر شەقامی 120 مەتریی هەولێر، ئێستا 65%ی نەخۆشخانەكە تەواو بووە كە بریتییە لە شەش باڵەخانە ئەوانیش بریتین لە، كارێگڕی و ڕاوێژكاری، خزمەتگوزاری، نەخۆشانی ئافرەت ( بۆ ماوەی درێژ)، نەخۆشانی ئافرەت( بۆ ماوەی كورت) ، نەخۆشانی پیاو ( كورتخایەن و درێژخایەن).

 

- زەوییەكە حكومەت دابینی كردووە و د. عوسمان نانەكەلی، خێرخوازی ناسراوی شاری هەولێریش تێچووی دروستكردنەكەی لە ئەستۆ گرتووە، كە بنەماڵەیەكی خێرخوازی ناوداری كوردن، تێچووەكەی نزیكەی پێنج ملیۆن دۆلارە.

 

- سەرۆكوەزیران مەسرور بارزانی، بە هەموو شێوەیەك پاڵپشتی پڕۆژەكەیە و دامەزراندنی ستاف و بەڕێوەبردن و سەرپەرشتیكردنی نەخۆشخانەكە لە ئەستۆی حكومەت دەبێت.

 

ئەوەی پێویستە بیزانیت: نەخۆشخانەكە 200 قەرەوێڵەییە و بە شێوازێكی پێشكەوتوو دروست دەكرێت و ڕێژەیەكی زۆر سەوزایی تێدایە، بەپێی گوتەی سەرپەرشتیارانی پڕۆژەكە، لە سەرەتا تاوەكوو ناوەڕاستی ساڵی داهاتوو تەواو دەبێت.