هاوردەی عێراق لە شەش مانگدا زیاتر لە 21 ملیار دۆلار بووە

ئاڤا نیوز

بانکی ناوەندیی عێراق ڕایدەگەیێنێت، هاوردەکانی عێراق بۆ چارەکی یەکەمی ساڵی 2025 گەیشتووەتە زیاتر لە 21 ملیار دۆلار.

 

وێنە گەورەکە: ئابووریی عێراق بە ڕادەیەکی زۆر پشتی بە هاوردەکردنی کاڵا و خزمەتگوزارییەکانی دەرەوە بەستووە. ئەمەش ئاماژەیە بۆ لاوازیی کەرتی بەرهەمهێنانی ناوخۆیی و دەرچوونی بڕێکی زۆری دراوی بیانی لە وڵات، کە ئابووریی عێراق بە لاوازی دەهێڵێتەوە.

 

ڕاگەیێنراوی فەرمی: بەگوێرەی ڕاگەیێنراوێکی بانکی ناوەندیی عێراق، "هاوردەکانی عێراق بۆ چارەکی یەکەمی ساڵی 2025 گەیشتووەتە 21 ملیار و 363 ملیۆن دۆلار، بۆ هەردوو کەرتی حکومی و کەرتی تایبەت".

 

ژمارەکان وادەڵێن: هاوردەکانی کەرتی حکومی گەیشتووەتە یەک ملیار و 377 ملیۆن دۆلار، لە کاتێکدا هاوردەی کەرتی تایبەت گەیشتووەتە 19 ملیار و 985 ملیۆن دۆلار.

 

لەهەمان کاتدا: بانکەکە ئاماژەی بەوە کردووە، هاوردە حکومییەکان بریتی بوون لە: هاوردەی بەکاربردن و هاوردەی سەرمایەیی و هاوردەی بەرهەمە نەوتییەکان و هاوردەی حکومیی دیکە و چاپکردنی دراو، لە کاتێکدا هاوردەکانی کەرتی تایبەت بریتی بوون لە: هاوردەی بەکاربردن و هاوردەی سەرمایەیی.