دوو ڤایرۆسی نوێ لە شەمشەمەکوێرە دەدۆزرێنەوە کە لە کۆرۆنا مەترسیدارترن

ئاڤا نیوز

زانایان لە چین دوو جۆر ڤایرۆسی نوێیان لە شەمشەمەکوێرەدا دۆزیوەتەوە کە لەوانەیە لە ڤایرۆسی کۆرۆنا مەترسیدارتر بن و ببنە هۆی پەتایەکی جیهانیی نوێ.

زانیاریی بەدەستهاتوو: بەپێی ڕاپۆرتێکی ڕۆژنامەی "دەیلی مەیل"ی بەریتانی، توێژەران هۆشداری دەدەن کە ئەم دوو ڤایرۆسە دەتوانن بۆ مرۆڤ بگوازرێنەوە و ببنە هۆی مردن. یەکێکیان دەبێتە هۆی هەوکردنی تووندی مێشک و ئەوی دیکەیان نەخۆشیی کۆئەندامی هەناسە دروست دەکات.

ئەوەی لەبارەیەوە دەگوترێت: زانایان دەڵێن ئەم ڤایرۆسانە، کە ناویان لێنراوە "هینیپاڤایرۆس"، پەیوەندییەکی نزیکیان بە ڤایرۆسەکانی "نیپا" و "هێندرا"ـوە هەیە، کە هەردووکیان بۆ مرۆڤ کوشندەن. جێی نیگەرانییە کە لە ئێستادا هیچ دەرمان و ڤاکسینێک بۆ چارەسەری ئەم دوو ڤایرۆسە نوێیە بوونی نییە.

زانیاریی زیاتر: توێژینەوەکە لە پارێزگای یونانی چین ئەنجامدراوە و تێیدا پشکنین بۆ گورچیلەی 142 شەمشەمەکوێرە کراوە. ڤایرۆسەکان لە جۆری شەمشەمەکوێرەی میوەخۆردا دۆزراونەتەوە کە لە نزیک گوند و باخەکان دەژین. بەهۆی ئەوەی ڤایرۆسەکە لە ڕێگەی میزەوە بڵاودەبێتەوە، مەترسیی پیسبوونی میوەکان و گواستنەوەی بۆ مرۆڤ لە ئارادایە.

پسپۆڕان جەخت لە پێویستیی چاودێری و لێکۆڵینەوەی زیاتر دەکەنەوە بۆ ڕێگریکردن لە کارەساتێکی مرۆیی لە داهاتوودا.