مامەڵەی زیاتر لە 19 هەزار خانەنشین تەواوبووە بەشێکی کەمیان ماوە مووچەیان ببەسترێت

ئاڤا نیوز

پڕۆسەی تەواوکردنی ئەو فەرمانبەرانەی لەسەرەتای ئەمساڵەوە خانەنشین بوون بەشێوەیەکی خێرا بەڕێوەدەچێت، تاوەکو ئێستا 19 هەزار و 241 کەس مامەڵەیان تەواوبووە.

وێنە گەورەکە: بەهۆی هاوتاکردنی تەمەنی خانەنشینی لەگەڵ عێراق کە خانەنشینیکردنی بەکۆمەڵی فەرمانبەرانی سێ تەمەنی لێ کەوتەوە، لە دایكبووانی ساڵەكانی 1962، 1963 و 196، نزیکەی 27 هەزار فەرمانبەر پێکەوە خانەنشین بوون، بەمەش فشارێکی زۆر کەوتە سەر فەرمانگەکان و بەڕێوەبەرایەتییەکانی خانەنشینی بۆ تەواوکردنی دۆسیەکانیان، بۆیە فەرمانبەرە خانەنشینکراوەکان ناچارن چەندین مانگ چاوەڕێی تەواوبوونی دۆسیە و بەستی مووچە بکەن.

لێدوانی فەرمی: سەرچاوەیەک لە بەڕێوەبەرایەتی گشتیی خانەنشینی هەرێمی کوردستان بە ئاڤای ڕاگەیاند: "ئەم مانگە مامەڵەی نۆ هەزار و 120 خانەنشین تەواو بووە لەگەڵ ئەوانەی مانگی ڕابردوو مووچەی مانگی شەش وەردەگرن، نزیکەی هەزار 900 مامەڵەی دیکەش لە خانەنشینی پارێزگاکانە دوای تەواوبوونیان لە لیستی مووچە زیاد دەکرێن."

زانیاریی زیاتر: بە گوتەی ئەو سەرچاوەیە، شەش بۆ حەوت هەزار کەس ماون مامەڵەکانیان تەواو بکرێت، ئەوانیش بەشێکی زۆریان لەوانەن کە 2025-07-01 خانەنشین دەبن، ئەگەر بەخێرایی لە فەرمانگەکان بۆ بەڕێوەبەرایەتییەکانی خانەنشینی بنێردرێن، لەماوەی یەک مانگدا سەرجەمیان تەواو دەکرێت.