فایلی خەڵك؛ ژمارەیەک نەخۆش لەڕێگەی ئاڤاوە داوای دەرزییەکی دەگمەن دەکەن

ئاڤا نیوز

چەند تووشبووێکی نەخۆشی 'کرۆنز' لە نەخۆشخانەی ڕزگاری لە هەولێر پێویستییان بەجۆرە دەرزیێکە کە لە نەخۆشخانەی حکومی زۆر بە زەحمەت دەستدەکەوێ و لە بازاڕیش نرخەکەی زۆر گرانە.

زانیاریی سەرەتایی: نەخۆشی کرۆنز، نەخۆشییەکی بە ئازار و قورسە، نەخۆشەکە بەردەوام کێشەی هەوکردنی کۆئەندامی هەرسی هەیە، زۆرجار برینی هەوکردنی کرۆنز لەنێو شانەی ڕیخۆڵەی تووشبوو بە قووڵی بڵاودەبێتەوە، بۆیە بەردەوام هەست بە ئازار دەکەن و زۆرجاریش هەڕەشە بۆ سەر ژیانی تووشبوو دروست دەکات، ئەو دەرزیە ژان و ئازارەکە کەمدەکاتەوە.

بۆچوونی هاووڵاتیان: کەسوکاری نەخۆشەکان بە ئاڤا دەڵێن، گرفتەکە ئەوەیە بڕێکی کەمی دەرزی 'ڕیدمکا' بۆ نەخۆشخانەی ڕزگاری دێت و بەشی هەموو نەخۆشەکان ناکات، هەر نەخۆشێکی تووشبووی کرۆنز، مانگانە سێ بۆ پێنج دەرزی پێویستە، دەڵێن لە بازاڕ نرخی هەر دەرزییەک لە 100 دۆلار کەمتر نییە.

لێدوانی تایبەت: د. دلۆڤان محەممەد، بەڕێوەبەری گشتیی تەندروستی هەولێر بە ئاڤای ڕاگەیاند، ئێستا وەزارەتی تەندروستی عێراق لە پشكی هەرێمی كوردستان بۆ دەرمان و كەرەستە پزیشكییەكان، ئەو دەرزییە ڕەوانە ناكات، "لە بازاڕیشدا نییە تا لەسەر ئەستۆی خۆمان بۆ نەخۆشەكان بكڕین".

- دوای ئەم پەیوەندییەی ئاڤا، "لەگەڵ كۆمپانیا ناوخۆییەكانی هاوردەكردنی دەرمان گفتوگۆ دەكەین بۆ ئەوەی پێیان ڕابسپێرین کە ئەو دەرمانە هاوردە بكەن، بەڵام بە مەرجی باش و كوالێتی و دڵنیابوون لە جۆرەكەی".

- "نە عێراق ڕەوانەی دەكات وەك بەشێك لە پشكی دەرمانی هەرێمی كوردستان، نە لە بازاڕیش بە ئاسانی دەستدەكەوێت تا بۆ نەخۆشخانە بكڕین".