چۆن نەوتی کوردستان دەتوانێت ببێتە فریادڕەسی عێراق؟

ئاڤا نیوز

هەوڵەکان بۆ دەستپێکردنەوەی نەوتی کوردستان بەردەوامن، شارەزایەکی بواری نەوت و وزە باسی مەترسییەکانی سەر عێراق و کاریگەرییەکانی جەنگی ئیسرائیل و ئێران دەکات و دەڵێت ڕاگرتنی هەناردەی نەوت، زیانی بە عێراق و هەرێمی کوردستان و تورکیاش گەیاندووە.

وێنە گەورەکە: ڕاگرتنی هەناردەکردنی نەوتی هەرێمی کوردستان بۆ ماوەی زیاتر لە دوو ساڵ و سێ مانگ، زیانی زیاتر لە 25 ملیار دۆلاری بۆ عێراق و هەرێمی کوردستان هەبووە، حکومەتی هەرێمی کوردستان هەوڵەکانی بۆ ڕێککەوتن لەسەر پرسی نەوت و هەناردەکردنەوەی چڕکردووەتەوە، بەمەش چاوەڕوان دەکرێت هەولێر و بەغدا ڕێکبکەون و هەناردەکردنەوەی نەوتی کوردستان دەست پێ بکاتەوە.

لێدوانی فەرمی: د. گۆڤەند شێروانی، شارەزا لە بواری نەوت و وزە بە ئاڤای ڕاگەیاند: ڕێککەوتنی نێوان هەولێر و بەغدا لەسەر پرسی نەوت گرنگە و خزمەت بە هەردوولا دەکات، بەجۆرێک کێشە داراییەکان چارەسەر دەکات، لەگەڵ ئەوەشدا ڕاگرتنی هەناردەکردنی نەوت زیانی بۆ عێراق و هەرێمی کوردستان، کۆمپانیا نەوتییەکان و تورکیاش هەبووە، دوایین زەرەرمەندیش بازاڕی وزەی جیهانی بووە کە 400 هەزار بەرمیل نەوتی لە دەستداوە.

زانیاریی زیاتر: بەوتەی د. گۆڤەند، دوای هەڵگیرسانی جەنگی ئیسرائیل و ئێران، مەترسییەکی زۆر لەسەر داخستنی گەرووی هورمز هەبوو، بە داخستنیشی داهاتی عێراق دەبووە سفر، چونکە لە 98%ـی هەناردەکردنی نەوتی عێراق لەڕێگەی بەسرە و کەنداوە، بە داخستنی گەرووەکە عێراق هیچ ڕێگایەکی بۆ نەدەمایەوە، بەمەش تاکە ڕێگا کە پاڵپشتیی داهاتی عێراقی دەکرد، هەناردەکردنی نەوت دەبوو لەڕیگەی هەرێمی کوردستانەوە.

ئەوەی پێویستە بیزانیت: پێشتر ڕۆژانە 400 هەزار بەرمیل نەوتی کوردستان هەناردە دەکرا، بەڵام لە داهاتوو دەتوانرێت توانای هەناردەکردنەکەی بۆ نزیکەی یەک ملیۆن بەرمیل زیاد بکرێت، ئەمەش یەک لەسەر سیێ داهاتی عێراق پڕ دەکاتەوە .