ئەنجوومەنی وەزیرانی فیدراڵ کۆدەبێتەوە و چاوەکان لەسەر خەرجکردنی مووچەی خەڵكی کوردستانە

ئاڤا نیوز

 

ئەمڕۆ ئەنجوومەنی وەزیرانی فیدراڵ کۆدەبێتەوە بەڵام دیار نییە بڕیار لە ناردنی مووچەی فەرمانبەرانی هەرێمی کوردستان دەدرێت یاخود نا، لە کاتێکدا کۆبوونەوە و دانوستاندنەکانی شاندی هەرێمی کوردستان لە بەغدا بەردەوامن.

 

چیرۆکی سەرەکی: دوای هاتنی شاندی حکومەتی عێراق بۆ هەرێمی کوردستان، ڕێکەوتنی سەرەتایی لە نێوان هەولێر و بەغدا کراوە و لەسەر پرس و خاڵە ناکۆکەکانیش کۆبوونەوەکانی نێوانیان بەردەوامە، ئێستا بۆ ئەم مەبەستە شاندێکی حکومەتی هەرێمی کوردستان لە بەغدایە بۆ ئەنجامدانی زنجیرەیەک کۆبوونەوە بۆ چارەسەرکردنی کێشەی مووچەی فەرمانبەران و هەناردەکردنەوەی نەوتی کوردستان بۆ بازاڕەکانی جیهان.

 

زانیاریی تایبەت: بەرپرسێکی باڵای حکومەتی هەرێمی کوردستان بە ئاڤا میدیای گوت، حکومەتی عێراق بەڵێنی داوە لە چەند ڕۆژی داهاتوو مووچەی مانگی پێنجی مووچەخۆرانی هەرێمی کوردستان بنێرێت.  بەڵام تا ئێستا بڕیاری لەسەر نەدراوە، بە وردیش نازانرێت چ ڕۆژێک پارەکە دەنێردرێت.

 

لێدوانی فەرمی: بەرپرسێک لە وەزارەتی دارایی و ئابوریی هەرێمی کوردستان بە ئاڤا میدیای گوت: ڕادەستکردنی 50% داهاتی ناوخۆ پێویستی بە ڕەزامەندیی ئەنجوومەنی وەزیرانە، هەر بڕیارێک لە ئەنجوومەنی وەزیران بدرێت کاری لەسەر دەکەین. تایبەت بە لیستی مووچە و تەوتین و کێشە تەکنیکیەکانیش هیچ کێشەیەک نەماوە، وەزارەتی دارایی عێراق پڕۆژەی هەژماری منی لە جیاتی تەوتین قبووڵ کردووە.

 

زانیاریی زیاتر: بەپێی زانیارییەکانی دەروون مەلا ناجی پەیامنێری ئاڤا لە بەغدا تا ئێستا دیار نییە پرسی مووچەی مووچەخۆرانی هەرێمی کوردستان لە بەرنامەی کاری کۆبوونەوەکەیە یان نا، لە کۆبوونەوەکانی پێشتریش ئەم بابەتە لە بەرنامەی کار نەبووە بەڵکو لەنێوان بەشێک لە وەزیرە کوردەکان و سەرۆکوەزیران لە چوارچێوەی کۆبوونەوەکان گفتوگۆی لەبارەوە کراوە.

 

گۆشەیەکی دیکەی دیمەنەکە: بەپێی بەدواداچوونەکانی دەروون مەلا ناچی: ئەو شاندەی هەرێمی کوردستان کە لە بەغدان لەگەڵ وەزارەتی نەوت گەیشتوونەتە ڕێکەوتنی سەرەتایی دەربارەی شێواز و قەبارەی بەرهەمهێنانی نەوت و پارەی کۆمپانیاکان، بڕیاریشە ئەو شاندە لەگەڵ نووسینگەی سەرۆکوەزیران و لیژنە ڕاوێژکارییەکانی حکومەتی عێراق و دیوانی چاودێریی دارایی کۆببنەوە، بۆ ئەوەی دووبارە نەوتی هەرێمی کوردستان هەناردە بکرێتەوە و کێشەی ناردنی مووچەی مووچەخۆرانی هەرێمی کوردستان چارەسەر بکرێت.