پەرلەمانتارێکی عێراق: چاوەڕوان دەکرێت ئەمڕۆ مووچە بنێردرێت

ئاڤا نیوز

 

ئەندامێکی فراکسیۆنی پارتی لە پەرلەمانی عێراق ڕاگەیاند: چاوەڕوان دەکرێت ئەمڕۆ ئەنجوومەنی وەزیرانی عێراق، بڕیار لە ناردنی مووچەی مانگی پێنج فەرمانبەرانی هەرێمی کوردستان بدات. 

 

وێنە گەورەکە:  دوای زیاتر لە دوو ساڵ مشتومڕ و کێشمەکێش لەسەر هەناردەکردنەوەی نەوت و کێشەی مووچەی خەڵکی کوردستان، هەفتەیەکە  هەردوو حکومەتی عێراق و کوردستان بەچڕی دەستیان بە دانوستان کردووە و خواستێکی جددی هەیە بۆ چارەسەرکردنی کێشەکان، هەردوولا ڕێککەوتنی سەرەتاییان کردووە و تەنیا واژۆکردن و ڕاگەیاندنی ڕێککەوتنی کۆتایی ماوە، چاوەڕوان دەکرێت لە کۆبوونەوەی ئەمڕۆدا ئەو بابەتەش باس بکرێت.

 

لێدوانی فەرمی: شێروان دووبەردانی، ئەندامی فراکسیۆنی پارتی لە پەرلەمانی عێراق ڕایگەیاند: شاندی هەرێمی کوردستان شەوی ڕابردوو گەڕاوەتەوە هەولێر و ڕێککەوتنێک کراوە کە ئەمڕۆ لە کۆبوونەوەی ئەنجوومەنی وەزیرانی عێراق بابەتی ڕێککەوتنی نیوان هەولێر و بەغدا باس بکرێت، هاوکات پێشبینی دەکرێت هەر ئەمڕۆ لەو کۆبوونەوەیە دا بڕیار لە تەمویلکردنی مووچەی فەرمانبەرانی هەرێمی کوردستان بۆ مانگی پێنج بدرێت.

 

٠ هەرێمی کوردستان ئامادەیی تەواوی نیشانداوە پابەندبێت بە تەواوی بابەتە دەستوورییەکان کە لە نێوان هەردوولا هەیە ئەوەی دەمێنێتەوە کە بەغدا پابەند بێت بە بڕیارەکانی خۆیەوە. 

 

٠ وەزارەتی دارایی عێراق وردبینی لە لیستی مووچەی مانگەکانی پێنج و شەشی فەرمانبەرانی هەرێمی کوردستان تەواو کردووە و تەنها ماوە بڕیاری خەرجکردنی بۆ دەربچێت. 

لەلایەکی دیکەوە: حکومەتی عێراق بەڵێنی بە حکومەتی هەرێمی کوردستان داوە لە چەند ڕۆژی داهاتوودا پارەی مووچەی مانگی پێنجی بۆ بنێرێت. بەرپرسێکی باڵای حکومەتیش لەو بارەیەوە بە ئاڤای گوت: ئەمە تەنیا بەڵێنە و بڕیاری ناردنی نەدراوە، دڵنیاش نین بەڵێنەکەی جێبەجێ دەکات یان نا، چونکە لە ڕابردوودا چەندینجار بەڵێنیان داوە و جێبەجێیان نەکردووە.