دوای چارەسەری کێشەی کارتە بانکییەکانیان؛ ئەندامانی حەشدی شەعبی مووچە وەردەگرن

ئاڤا نیوز

دوای ئەوەی مووچەی مانگی حوزەیرانی ئەندامانی حەشدی شەعبی بەهۆی ڕاگرتنی کارتە بانکییەکانیان لەکاتی خۆیدا دابەشنەکرا، ئێستا کێشەکانیان چارەسەرکراوە و لە ئەمڕۆ بەدواوە مووچەکانیان وەردەگرن.

وێنە گەورەکە: 28ی ئەم مانگە فەرماندە باڵاکانی حەشدی شەعبیی و پەرلەمانتارانی عێراق ئاشکرایان کرد کە بەهۆی ترسی لە سزاکانی ئەمریکا، ئەو کۆمپانیا تایبەتەی کارتی بانکی بۆ ئەندامانی حەشد دروستکردبوو لە پرۆسەکە کشاوەتەوە و  بەوهۆیەش دابەشکردنی مووچە ڕاگیراوە، بەڵام دواتر دەستەی حەشدی شەعبی چارەسەربوونی کێشەکەی ڕاگەیاند.

 

زانیاریی لە پەیامنێرەوە: دەروون مەلا ناجی، پەیامنێری ئاڤا میدیا لە بەغدا ڕایگەیاند، لە ئەمڕۆوە ئەندامانی حەشدی شەعبی لینکێکی ئەلیکترۆنییان بۆ نێردراوە و دوای ئەوەی زانیاریی کارتە بانکییەکەیان تۆمار دەکەن، لینکەکە شوێنی دابەشكردنی مووچەکانیان بۆ دەنێرێت و دەتوانن بچن مووچەکانیان لەو شوێنە وەربگرن.

 

وتیشی، ئەم ڕێکارە کاتییە و تەنیا بۆ مووچەی مانگی شەش بووە، بڕیارە لە مانگی داهاتووەوە ئەندامانی حەشدی شەعبی مووچەکانیان لەجێگەی بانکی ڕافیدەین، لەڕێگەی کارتە بانکییەکانی بانکی نەهرەینەوە وەردەگرن.