400 هەزار تۆن گەنم لە جووتیارانی کەرکووک وەرگیراوە

ئاڤا نیوز

پرۆسەی وەرگرتنی گەنم لە سایلۆکانی کەرکووک دەگاتە قۆناغی کۆتایی و تاوەکو ئێستا تەنیا گەنم وەرگیراوە و هیچ جووتیارێک شایستەی دارایی لە بەرامبەر ڕادەستکردنی گەنمەکە پێنەدراوە.

وێنە گەورەکە: زیاتر لە مانگێکە پرۆسەی وەرگرتنی گەنمی جووتیارانی کەرکووک لە سایلۆکان دەستیپێکردووە، لەچوارچێوەی پلانی کشتوکاڵی 527 هەزار و 521 تۆن، لە دەرەوەی پلانی کشتوکاڵیش نزیکەی 100 هەزار دۆنمی زەوی بەراو گەنمەکەیان وەردەگیرێت کە 85 هەزار تۆن گەنم دەکات.

لێدوانی فەرمی: محەممەد ئەحمەد، لێپرسراوی هۆبەی زەویوزار لە کشتوکاڵی کەرکووک بە ئاڤای گوت، "تاوەکو ئێستا زیاتر لە 400 هەزار تۆن گەنم لە کەرکووک وەرگیراوە و لەماوەی ڕۆژانی داهاتوو ئەو بڕەی کە دەمێنێت ئەویش لە جووتیاران وەردەگیرێت."

زانیاریی زیاتر: پرۆسەی وەرگرتنی گەنم لە سایلۆکانی سنووری پارێزگای کەرکووک خێرایە و ڕۆژانە نزیکەی 15 هەزار تۆن گەنم لە جووتیاران وەردەگیرێت.