پەیامێکی تووند لە ئەمریکاوە بۆ بەغدا لەبارەی هەناردەکردنەوەی نەوتی کوردستان

ئاڤا نیوز

وتەبێژی وەزارەتی دەرەوەی ئەمریکا دەڵێت، پێویستە بەپەلە هەناردەکردنەوەی نەوتی کوردستان لەڕێگەی بۆری عێراق - تورکیاوە دەست پێبکاتەوە، چونکە داخستنی زیانی بە سێ کۆمپانیای ئەمریکی گەیاندووە و ئەمەش "قەبووڵنەکراوە".

وێنە گەورەکە: سەرەڕای پابەندییەکانی حکومەتی هەرێمی کوردستان بە ڕێککەوتنەکان لەگەڵ حکومەتی عێراق بۆ هەناردەکردنەوەی نەوت، بەڵام تاوەکو ئێستا ئەو کێشەیە چارەسەر نەبووە، ئەمەش ئەمریکای نیگەران کردووە.

لێدوانی فەرمی: تامی برووس، وتەبێژی وەزارەتی دەرەوەی ئەمریکا لە لێدوانێکی تایبەتدا بە"ئاڤا میدیا" ڕایگەیاند، "زۆر گرنگە حکومەتی عێراق، حکومەتی هەرێمی کوردستان و لایەنە پەیوەندیدارەکانی تر بەپەلە کاربکەن بۆ دەستپێکردنەوەی کارەکانی بۆری نەوتی عێراق - تورکیا. بازرگانیی سێ کۆمپانیای ئەمریکی ڕاستەوخۆ زیانیان بەرکەوتووە بەهۆی داخستنی بۆرییەکەوە. ئەمە قەبووڵنەکراوە. ئێمە چەندین جار داوامان لە هەموو لایەنەکان کردووە کێشەکانیان چارەسەر بکەن و دواخستنی پرسەکە قەبووڵ ناکەین."

زانیاریی زیاتر: بە گوتەی وتەبێژەکە،  داخستنی بۆرییەکە جگە لە پەکخستنی گەشەی ئابووریی عێراق و لاوازکردنی بەرژەوەندیی کۆمپانیا ئەمریکییەکان، یارمەتیدەر بووە بۆ زیادبوونی هەژموونی ئێران لە ناوچەکەدا. لەمبارەیەوە وتی: "پێویستە ئەم پرسە چارەسەر بکرێت، ئەویش بە زووترین کات."

 "بۆرییەکە ڕێڕەوێکی جێگرەوەی گرنگ بۆ گەیاندنی نەوت بە بازاڕەکانی جیهان دابین دەکات، کە سوودی بۆ ئابووریی عێراق و هەرێمی کوردستان هەیە، هەروەها بۆ ئەو کۆمپانیا ئەمریکییانەش کە لەوێ کار دەکەن. کردنەوەی ئەم بۆرییە لە بەرژەوەندیی ئەمریکا، هەرێمی کوردستان، عێراقی فیدراڵ و تەواوی ناوچەکەدایە."