کۆمیسیۆن بۆ ئاڤا: دەرگای پێشکەشکردنی لیستی کاندیدان دووبارە ناکرێتەوە

ئاڤا نیوز

کۆمیسیۆنی باڵای سەربەخۆی هەڵبژاردنەکانی عێراق ڕایگەیاند، دەنگۆی سەرلەنوێ کردنەوەی دەرگای داواکاریی بۆ پێشکەشکردنی لیستی کاندیدان بۆ هەڵبژاردنی پەرلەمانی عێراق ڕاست نییە و دووبارە دەرگای پێشکەشکردنی داواکاریی ناکرێتەوە.

ئەوەی لەبارەیەوە دەگوترێت: دوای سەردانەکەی 1ـی ئەم مانگەی موقتەدا سەدر، ڕێبەری ڕەوتی نیشتیمانی شیعی بۆ لای عەلی سیستانی مەرجەعی باڵای شیعەکان لە عێراق، دەنگۆی ئەوەی بڵاوکرایەوە کە سەدر لە بڕیاری بایکۆتی هەڵبژاردن پاشگەز دەبێتەوە و وەک دەرفەتدانیش بەو لایەنە، کۆمیسیۆن دووبارەی دەرگای پێشکەشکردنی لیستی کاندیدان دەکاتەوە.

لێدوانی فەرمی: جومانە غەلای، وتەبێژی کۆمیسیۆنی باڵای سەربەخۆی هەڵبژاردنەکانی عێراق بە ئاڤا میدیای ڕاگەیاند، هیچ گریمانەیەک نییە بۆ سەرلەنوێ کردنەوەی دەرگای پێشکەشکردنی لیستی کاندیدی حیزب و هاوپەیمانێتییەکان، چونکە ئەنجوومەنی کۆمیسیاران 26ـی حوزەیرانی وەک کۆتا وادە بۆ ئەم پڕۆسەیە دیاریکرد و درێژکردنەوەی وادەکەی ڕەتکردەوە.

ئەوەی پێویستە بیزانیت: 26ـی ئەم مانگە ماوەی پێشکەشکردنی لیستی کاندیدی حیزب و هاوپەیمانێتییەکان کۆتاییهات، بەگوێرەی بەرپرسانی کۆمیسیۆنیش نزیکەی هەشت هەزار کاندید کێبڕکێ لەسەر 329 کورسییەکەی پەرلەمان دەکەن.