نەخۆشخانەی ئافرەتان و لەدایکبوونی هەولێر نۆژەن دەکرێتەوە

ئاڤا نیوز

یەکێک لە دێرینترین نەخۆشخانەکانی شاری هەولێر نۆژەن دەکرێتەوە، بەڕێوەبەری تەندروستی هەولێریش دەڵێت 'لە ماوەی 280 ڕۆژدا دەبێت کارەکانی تەواو بکرێت'.

وێنە گەورەکە: کەرتی تەندروستی یەکێکە لە کارە لەپێشینەکانی حکومەتی هەرێمی کوردستان، بۆیە لە کابینەی نۆیەمدا چەندین پڕۆژەی گرنگی تەندروستی لە شار و شارۆچکەکان جێبەجێکراون.

لێدوانی فەرمی: د. دلۆڤان محەممەد، بەڕێوەبەری تەندروستی هەولێر، بە ئاڤا میدیای ڕاگەیاند: نەخۆشخانەی ئافرەتان و لەدایکبوونی فێرکاری هەولێر نۆژەن دەکرێتەوە، بەڵام لەبەر گرنگی نەخۆشخانەکە دەبێت بەش بەش کاری تێدا بکرێت، بۆ ئەوەی نەخۆشخانەکە دانەخرێت.

زانیاریی زیاتر: بە گوتەی بەڕێوەبەری تەندروستی هەولێر، ئەنجوومەنی وەزیرانی هەرێمی کوردستان، بڕی دوو ملیار و 390 ملیۆن دیناری بۆ نۆژەنکردنەوەی نەخۆشخانەکە تەرخان کردووە، دەبێت لە ماوەی 280 ڕۆژدا کارەکانی تەواو بکرێت.

ئەوەی پێویستە بیزانیت: دوای نۆژەنکردنەوەی نەخۆشخانەی ئافرەتان و لەدایکبوونی فیرکاری هەولێر دەبێت، بە یەکێک لە نەخۆشخانە ستانداردەکانی کوردستان.