تەنیا لە مانگێکدا 24 نەشتەرگەری گەورە لە نەخۆشخانەی پێشمەرگە کراون

ئاڤا نیوز

لە مانگی ڕابردوو، 24 نەشتەرگەری گەورە لە نەخۆشخانەی پێشمەرگە کراون و هەموو ڕۆژانی دووشەممە و چوارشەممەش بێبەرامبەر نەشتەرگەری لە نەخۆشخانەکە دەکرێن.

وێنە گەورەکە: نەخۆشخانەی پێشمەرگە لە هەولێر، نەخۆشخانەیەکی حکومییە و تایبەتە بە هێزەکانی پێشمەرگە و کەسی یەکەمیان و کەسوکاری شەهیدان،  سەرجەم خزمەتگوزارییە تەندروستییەکانی بەخۆڕایین، ئەم نەخۆشخانەیە ساڵی 2019 دەست بە دروستکردنی کرا و لە یەکی ئاداری 2021 دەستبەکاربوو.

زانیاریی زیاتر: بۆ پێشوازی لە نەخۆش، مانگانە خشتەی پزیشکانی پسپۆڕی نەخۆشخانەکە ڕادەگەینڕیت کە پێکهاتوون لە پسپۆڕیەکانی هەناو، نەشتەرگەری گشتی، ئێسک و شکان، ئافرەتان سۆنار، چاو، دڵ، قوڕگ و لووت و گوێ ، بڕبڕەی پشت و مێشک و دەمار، ددان و پێست.

لێدوانی فەرمی: عەقید ئەیوب ئەحمەد، بەڕێوەبەری نەخۆشخانەی پێشمەرگە بە ئاڤا میدیای گوت: هەر چارەخوازێک پێشمەرگە و کەسی پلەیەکی، کەسوکاری شەهیدان و ئەنفالکراوان ئەوانەی پێویستیان بە چارەسەری هەیە، دەتوانن ڕاستەوخۆ سەردانمان بکەن، بۆ وەرگرتنی چارەسەری، پزیشکە خولاوەکانیش 24 کاتژمێر ئامادەن بۆ هەر رووداوێکی فریاکەوتنی لەناکاو، هەموو ڕۆژانی دووشەممە و چوارشەممەش، نەشتەرگەری ئەنجام دەدرێن، هەموو چارەسەریەکانیش بێبەرامبەرن.

ژمارەکان وادەڵێن: تەنیا لە مانگی شەشی ئەمساڵ لە نەخۆشخانەی پێشمەرگە پێشوازی لە سێ هەزار و 191  نەخۆش کراوە و 24 نەشتەرگەری گەورەش ئەنجام دراون.