پارێزگاری کەرکووک لەبارەی گرژییەکانی پردێ لیژنەیەکی پێکهێنا

ئاڤا نیوز

 

پارێزگاری کەرکووک لیژنەیەکی بەسەرۆکایەتیی محەممەد حافز، سەرۆکی ئەنجوومەنی پارێزگا بۆ لێکۆڵینەوە لە کێشەکانی ناحیەی پردێ و بەدواداچوون بۆ داواکاریی پێکهاتەی تورکمان لەو ناحیەیە پێکهێنا. 

 

وێنە گەورەکە: ئەمڕۆ پێنجشەممە لایەنگرانی پێکهاتەی توركمان لە ناحیەی پردێ خۆپیشاندانیان ئەنجامدا و بۆماوەیەک ڕێگەی کەرکووک - هەولێریان داخست. تورکمانەکان چەند داواکارییەکیان هەیە، ئەویش ئەوەیە کە یەکێک لە پۆستەكانی: بەڕێوەبەری شارەوانی، بەڕێوەبەری پۆلیس یاخود بەڕێوەبەری ناحیەی پردێ بۆ پێكهاتەی توركمان بێت، ئەوەش لەكاتێكدا بەڕێوەبەری ناحیەکە بەركەوتەی كوردە و ئێستا كوردێك پۆستەكە بەڕێوە دەبات، خۆپیشاندەران بۆ جێبەجێكردنی داواكارییەكانیان، ماوەی سێ ڕۆژیان بە بەرپرسانی حكومی پارێزگاكە دابوو، هۆشداریشیان دابوو لەوەی دوای تەواوبوونی وادەكە بازنەی ناڕەزاییەتیەكان فراوان دەكەن.

 

زانیاریی بەدەستهاتوو: ڕێبوار تەها، پارێزگاری کەرکووک سەبارەت بە گرژییەکانی ناحیەی پردێ سەرپەرشتی کۆبونەوەیەکی کرد و بڕیاری دا بە پێکهێنانی لیژنەیەک بەسەرۆکایەتیی محەممەد حافز سەرۆکی ئەنجوومەنی پارێزگا بۆ چارەسەری کێشەکانی پردێ و بەدواداچوون بۆ داواکاریی خۆپیشاندەران.

 

چی ڕوویدا: خۆپیشاندەران لەڕێگەی سووتاندنی تایە و دانانی بەربەستی بەردی، ڕێگەی سەرەكی هەولێر-كەركووكیان داخست و بەهۆیەوە ماوەی چەند كاتژمێرێك هاتووچۆ لە شەقامەكە پەكی کەوت. هەروەها گرژی و ئاڵۆزی و بەریەككەوتن لەنێوان خۆپیشاندەران و هێزە ئەمنییەكان دروستبوو، لەو كاتەی پۆلیسی چالاكی مەدەنی و ئەفسەرانی سەر بە فیرقەی هەشتی سوپای عێراق، هەوڵی بڵاوەپێكردنی خەڵكە ناڕەزاییەكە و كردنەوەی ڕێگەكەیان دەدا، لەڕێگەی ڕشاندنی ئاو بۆ كوژاندنەوەی ئاگرەكە و لابردنی بەربەستە بەردییەكان.