بەڕێوەبەری فڕۆکەخانەی هەولێر: گەشتەکانی فڕۆکەخانە ئاسایی بوونەوە

ئاڤا نیوز

دوای ئەوەی ئەمشەو دەنگی تەقینەوەیەکی گەورە لە نزیک فڕۆکەخانەی هەولێر بیسترا، یەکێک لە فڕۆکەکان ناچار بووە ئاراستەی گەشتەکەی بگۆڕێت. بەڕێوەبەری گشتیی فڕۆکەخانەی هەولێر بە ئاڤا میدیای ڕاگەیاند، گەشتەکان ئاسایی بوونەتەوە.

لێدوانی فەرمی: دانا تۆفیق، بەڕێوەبەری گشتیی فڕۆکەخانەی نێودەوڵەتیی هەولێر بەوەکالەت بە ئاڤا میدیای ڕاگەیاند: گەشتەکانی فڕۆکەخانەی نێودەڵەتیی هەولێر ئاسایی بووەتەوە، بەهۆی ڕووداوەکە تەنیا یەک فڕۆکەی فڵای ئەربیل لە کاتی دابەزینی گەشتەکەی دواخراوە.

بەڕێوەبەری فڕۆکەخانەی هەولێر بە وەکالەت ئەوەش دەڵێت: ڕوواوەکە هیچ زەرەر و زیانێکی بۆ فڕۆکەخانەی هەولێر نەبووە.

ئەوەی پێویستە بیزانیت: نزیکەی کاتژمێر 10ـی ئەمشەو لە کۆمەڵگەی سێبیران نزیک فڕۆکەخانەی هەولێر دەنگی تەقینەوەیەکی گەورە بیسترا. ئەگەرچی هێشتا ئاسایش هیچ ڕوونکردنەوەیەکی نەداوە، بەڵام بەگوێرەی وتەی خەڵکی ناوچەکە درۆن بووە.