فایلی خەڵک؛ دانیشتووانی ڕانیە داوای ڕووناککردنەوەی شەقامێکی سەرەکی شارەکەیان دەکەن

ئاڤا نیوز

بەشێك لە دانیشتووانی شاری ڕانیە سەبارەت بە شەقامێكی شارەكە گلەییان هەیە و داوا دەکەن شەقامەکەیان بۆ ڕووناک بکرێتەوە.

چیرۆکی سەرەکی: شەقامی پیشەسازی لە ڕانیە لە شەواندا تاریكستانە و لایتی ئۆتۆمبێلەكان نەبێت كەس بەرچاوی خۆیشی نابینێت. دانیشتووانی شارەكە دەڵێن چەند ساڵێکە ستوونی کارەبا بۆ شەقامەکە دانراوە و ژمارەیەكی زۆر گڵۆپیشی بۆ بەستراوە، بەڵام تاوەکو ئێستا ڕووناک نەکراوەتەوە. شەقامەکەش مزگەوت و قوتابخانە و بەنزینخانەی لەسەرە و شەقامێكی ئاوەدانە.

لێدوانی فەرمی: عەلی محەممەد، بەڕێوەبەری گشتیی کارەبای ڕاپەڕین بە ئاڤا میدیای ڕاگەیاند، پڕۆژەکە بەهۆی قەیرانی داراییەوە وەستاوە، "چاوەڕێ دەکەین حکومەت چارەسەرێکی بۆ بدۆزێتەوە، بە جۆرێک بەڵێندەرێکی نوێ بێت و کارەکانی پرۆژەکە تەواو بکات". 

- "لە کاتی دابینکردنی بودجە بۆ پرۆژەکە، ڕاستەوخۆ کارەبای بۆ ڕادەکێشین و شەقامەکە ڕووناک دەکەینەوە".