ڕاگەیێنراوێک لە حکومەتی عێراق لەبارەی ڕووداوەکەی کفری

ئاڤا نیوز

شانەی ڕاگەیاندنی ئەمنیی عێراق ڕایگەیاند، سوپا، حەشدی شەعبی و هێزەکانی پێشمەرگەی کوردستان هیچ جووڵەیەکی سەربازییان لە ناوچە کێشە لەسەرەکان ئەنجامنەداوە و دەنگۆی جووڵەی تاکلایەنەی سەربازییش لەو ناوچانەدا بە بێ بنەما و ناڕاست لەقەڵەم دەدات.

 

چیرۆکی سەرەکی: ئێوارەی ئەمڕۆ هەینیی تیمێکی وەزارەتی نەوتی عێراق چوون بۆ کێڵگەی نەوتی قەمەر لە کفری، بەڵام لەلایەن پێشمەرگە و هێزی پۆلیسی نەوت و گازی هەرێمەوە رێگرییان لێکراوە.

ڕاگەیێنراوی فەرمی: شانەی ڕاگەیاندنی ئەمنی عێراق لە ڕاگەیێنراوێکدا ئاماژەی بەوەکردووە، لەناوچەی ئەمنیی هاوبەش (ناوچە کوردستانییەکانی دەرەوەی ئیدارەی هەرێمی کوردستان) هیچ جووڵەیەکی تاکلایەنە نەبووە و هێزە ئەمنییەکانی عێراق و هەرێمی کوردستان لەو ناوچانە هەماهەنگییەکی ئەمنیی پتەویان هەیە، کاری پێکەوەییش بۆ ڕووبەڕووبوونەوەی تیرۆر بەردەوامە.

زانیاریی زیاتر: شانەی ڕاگەیاندنی ئەمنی عێراق ئەوەشی خستووەتەڕوو، سەرجەم هێزە ئەمنییەکان لە ناوچەکانی خۆیانن و ئەرکی خۆیان ئەنجام دەدەن، هەر ئەرکێکیش هەبێت بە هەماهەنگی نێوان هێزەکانی حکومەتی فیدڕاڵ و هێزەکانی پێشمەرگەی کوردستان ئەنجام دەدرێت.

شانەی ڕاگەیاندنی ئەمنی عێراق داواش لە دەزگاکانی ڕاگەیاندن دەکات تەنیا لە سەرچاوە فەرمییەکانەوە زانیاریی وەربگرن و بڵاوی بکەنەوە، چونکە هەواڵێکی لەو شێوەیە کاریگەریی لەسەر ئاشتیی کۆمەڵایەتی دەبێت، بەتایبەت لەم دۆخەکەدا هەماهەنگی نێوان خەڵک و هێزە ئەمنییەکان بۆ پاراستنی ئارامی وڵات کارێکی خوازراو و پێویستە.