وەزارەتی دارایی لیستی ئەو کەسانەی لە داهاتی ناوخۆ مووچە وەردەگرن جیا دەکاتەوە

ئاڤا نیوز

وەزارەتی دارایی و ئابووری هەرێمی کوردستان، گەنجینەکانی ئاگادار کردووەتەوە کە لیستی ئەوانەی گرێبەستن، یان بە کرێی ڕۆژانە کار دەکەن و مووچەکانیان لەسەر داهاتی ناوخۆیە، جیا بکەنەوە و ڕەوانەی وەزارەت بکرێت.

وێنە گەورەکە: هەزاران فەرمانبەر مانگانە لەسەر داهاتی ناوخۆی حکومەتی هەرێمی کوردستان مووچە وەردەگرن، ئێستا وەزارەتی دارایی و ئابووری داتاکانیان کۆ دەکاتەوە بۆ ئەوەی بە شەفافی بیخاتە بەردەم بەرپرسانی بەغدا و ڕوون بێت کە بەشێکی داهاتی ناوخۆ بۆ مووچەی ئەو توێژانە دابین دەکرێت.

لێدوانی فەرمی: سەرچاوەیەک لە وەزارەتی دارایی و ئابووری بە ئاڤای گوت، دەمانەوێت نوێترین ئەپدەیتی ئەو داتایەمان لەبەردەست بێت، هەر کاتێک بەغدا داوای کرد دەخرێتە بەردەمیان، سەرجەم بەشەکان جیا دەکرێنەوە بەجیا داتاکان و تێچووی مانگانەیان دەخرێتەڕوو.

زانیاریی زیاتر: لە هەرێمی کوردستان چەند جۆرێک گرێبەست هەن کە مووچەی مانگانەیان لەسەر داهاتی ناوخۆی هەرێمی کوردستان دابین دەکرێت، پێکهاتوون لە گرێبەستی داهات، گرێبەستی ئاسایی، گرێبەستی ئەوانەی بازرگانیین و پێیان دەڵێن گرێبەستی (کەپەک) و ئەوانەشی بە کرێی ڕۆژانە کار دەکەن.