لە 20 ڕۆژدا فرۆشگایەکی هەولێر پێنج هەزار بووکەڵەی لابووبوو دەفرۆشێت

ئاڤا نیوز

 

بووکەڵەیەک دەبێتە ترێندی سۆشیاڵ میدیا و لە ماوەی 20 ڕۆژدا فرۆشگایەکی هەولێر 5 هەزار دانەی لێ دەفرۆشێت و دەشڵێن: بووکەڵەکە داواکاری زۆری لەسەرە.

 

وێنە گەورەکە: بووکەڵەی لابووبوو لە چەند زنجیرەیەکدا دەرکەوتووە کە دیارترینیان the monters و Big into Energy  و Have a seat  و Fall in wild بوون، بووکەڵەکە لە سەرانسەری جیهان بووەتە ترێندی سۆشیال میدیا، سەدان ڤیدیۆی جیاواز لەبارەیەوە بڵاوکراوەتەوە و ماوەیەکیشە کەوتووەتە بازاڕەکانی هەرێمی کوردستانەوە و خەڵکێکی زۆر بووکەڵەکە دەکڕن.

 

لێدوانی فەرمی: ئاڤا میدیا پەیوەندیی بە ئاری گەیمینگ ستۆرەوە کرد، ئەوان بە ئاڤایان ڕاگەیاند: لە 20 ڕۆژی ڕابردوودا نزیکەی پینج هەزار بووکەڵەی لابووبوویان فرۆشتووە، سێ هەزار دانەی دیکەشیان داوا کردووە و ڕۆژانی داهاتوو دەگەنەوە شاری هەولێر، بووکەڵەکە داواکارییەکی زۆری لەسەرە و نرخی 14 هەزار دینارە، نرخەکەشی بەپێی ڕۆژ گۆڕانکاریی بەسەردا دێت. 

 

بەگوتەی کارمەندانی ئاری گەیمینگ ستۆر، جگە لەوەی هاووڵاتیان سەردانی فرۆشگاکەیان دەکەن و بووکەڵەکە دەکڕن، بەشێکیان لەڕێگەی ئۆنلاینەوە داوا دەکەن و بۆیان دەنێرینەوە ماڵەوە.

 

لەلایەکی دیکەوە: نەوزاد شێخ کامیل، بەڕێوەبەری گشتیی بازرگانی لە وەزارەتی بازرگانی و پیشەسازی بە ئاڤای گوت: مۆڵەتمان بە هیچ بازرگانێک نەداوە کە بووکەڵەیەکی تایبەت بهێنێتە هەرێمی کوردستان، بەڵکو هەر کەسێک بووکەڵەیەکی لەمشێوەیەی هێنابێت، ئەوا لەگەڵ کاڵای دیکە داوای کردووە و هیچ داتایەکی دیاریکراو لەسەر ئەم بووکەڵەیە لای ئێمە بەردەست نییە.