ئومێد خۆشناو: پرۆژەی ڕووناكی لە سەنتەری هەولێر تەواو بووە و گەیشتووەتە دەوروبەری شار

ئاڤا نیوز

پارێزگاری هەولێر ڕایدەگەیەنێت، پرۆژەی ڕووناكی كۆتایی بە تراژیدیای درێژخایەنی كێشەی كارەبا هێنا و ڕۆڵی بەرچاوی لە خاوێنكردنەوەی ژینگەی هەولێر هەیە.

وێنە گەورەکە: لە چوارچێوەی پرۆژەی ڕووناکیی حکومەتی هەرێمی کوردستان کە مەبەست لێی دابینکردنی کارەبای 24 کاتژمێرییە لە تەواوی کوردستان، سەرجەم گەڕەكەكانی دیوی ناوەوەی شەقامی بازنەیی 120 مەتریی هەولێر، كارەبای 24 كاتژمێریان پێگەیشتووە.

لێدوانی فەرمی: ئومێد خۆشناو، پارێزگاری هەولێر تایبەت بە ئاڤا ڕایگەیاند، سەرجەم گەڕەكەكانی دیوی ناوەوەی شەقامی بازنەیی 120 مەتریی هەولێر، كارەبای 24 كاتژمێریان پێگەیشتووە و پرۆژەكە گەیشتووەتە بەشێك لە گەڕەكەكانی دیوی ناوەوەی شەقامی 150 مەتریش، ئێستاش هەنگاو بۆ دەوروبەری شاری هەولێر نراوە.

پارێزگاری هەولێر باسی لەوەشكرد، پرۆژەی ڕووناكی، جگە لەوەی كاریگەری ئەرێنی لەسەر ژیانی ئاسایی هاووڵاتییانی هەرێمی كوردستان و گرفتی ساڵەهای ساڵی خراپی كارەبای چارەسەر كرد، ژینگەی هەولێریش بە نەمانی هەزاران مۆلیدەی ئەهلی گەڕەكەكان و موەلیدەی تایبەتی ماڵان و كارگە و شوێنە بازرگانییەكان، پاك دەبێتەوە و لە ئاییندە كاریگەرییەكانی بەدەردەكەون.

باکگراوند: بە فەرمانی سەرۆكوەزیران مەسرور بارزانی، پرۆژەی ڕووناكی لە تەواوی هەرێمی كوردستان بە هاوتەریبی جێبەجێ دەکرێت، دەبێت لە ماوەی دوو ساڵدا سەرجەم دانیشتووان ببنە خاوەنی كارەبای 24 كاتژمێری.