ئومێد خۆشناو: بەغدا 12 ساڵە بودجەی پەرەپێدانی پارێزگاكانی ڕەوانە نەكردووە

ئاڤا نیوز

پارێزگاری هەولێر ڕایدەگەیەنێت، بەغدا لەوەتەی 2013ـەوە پشكی پەرەپێدانی پارێزگاكانی لە بودجەی گشتی بۆ پارێزگاكانی هەرێمی كوردستان نەناردووە، لە ناردنی سووتەمەنی و وەرگرتنی گەنمی جووتیارانیش، جیاكاری دەكات.

لێدوانی فەرمی: ئومێد خۆشناو، پارێزگاری هەولێر تایبەت بە ئاڤا ڕایگەیاند، جیا لە پێشێلكارییە دەستوورییەكان و فەرامۆشكردنی بنەمای هاوبەشی و بڕینی قووتی خەڵكی كوردستان، "لەماوەی چوار ساڵی دەستبەكاربوونم وەك پارێزگاری هەولێر، حكومەتی فیدراڵی پشكی خەرجی بەکاربردنی لە بودجەی پەرەپێدانی پارێزگاكان بۆ پارێزگای هەولێر نەناردووە". تەنانەت لە 2013ـەوە بودجەی پەرەپێدانی پارێزگاكان لەسەر پارێزگاكانی هەرێمی كوردستان بڕدراوە.

پارێزگاری هەولێر ئاماژەی بەوەشكرد، بەغدا لە پشكی نەوتی سپیی ماڵان و بەنزین، تەنانەت لە وەرگرتنی بەرهەمی گەنمی جووتیارانیش جیاكاری دەكات.