پزیشكێكی كورد وەك باشترین 100 پزیشكی جیهان هەڵدەبژێردرێت

ئاڤا نیوز

پزیشكێكی كورد لە ڕێوڕەسمی خەڵاتكردنی باشترین پزیشكەكانی جیهان لە پسپۆڕی دداندا، بەفەرمی لەنێو 100 باشترین پزیشكی جیهان بۆ ساڵی 2025 هەڵبژێردرا.

وێنە گەورەکە: پەیمانگەی لووتكەی جیهان بە بەشداری هەزاران پزیشك و پسپۆڕی جیهانی كە لە 150 وڵاتی جیهانەوە هاتبوون، لە دوورگەی ساردینیا سەر بە هەرێمی كالیاریی ئیتاڵیا، ڕێوڕەسمی خەڵاتكردنی پزیشكانی جیهانی ڕێكخست، 100 پزیشكی لە پسپۆڕی چارەسەریی ددان، وەك باشترین پزیشكەكانی ساڵی 2025 خەڵات كرد، لەنێو براوەی خەڵاتەكانیش؛ دكتۆر فوئاد سورچی، بە فەرمی لە 100 باشترین پزیشكی جیهان بۆ ساڵی 2025 هەڵبژێردرا.

مەڕاسیمەكە بۆ ماوەی سێ ڕۆژ بەردەوام بوو، پزیشكە بەشداربووەكان بە پێشكەشكردنی توێژینەوە و ئەنجامدانی سیمینار و پانێڵ، ئەزموونی كاری خۆیان لەگەڵ هاوپیشەكانیان ئاڵوگۆڕ كرد، لەپێناو بەرزكردنەوەی توانای پسپۆڕی بۆ پەرەپێدانی پزیشكی ددان.

ئەوەی پێویستە بیزانیت: دکتۆر فوئاد سورچی، بچووکترین پزیشکە لە نێوان سەرجەم ئەو ناوانەی بۆ ئەم ڕێوڕەسمە هەڵبژێردران، ئەویش لەسەر بنەمای کۆمەڵێک پێوەری ورد بووە، لەوانە؛ لێهاتوویی پیشەیی، باشی توێژینەوە، خزمەتکردنی کۆمەڵگە و بەشداریکردن لە پەروەردە و ڕاهێنانی پزیشکی.