جۆرێکی نوێی خوێن لە جیهان دۆزرایەوە

ئاڤا نیوز

لە لێکۆڵینەوەیەکی نوێدا جۆرێکی نوێی خوێن دۆزرایەوە کە تەنیا یەک کەس لە جیهاندا هەڵگری ئەم جۆرە خوێنەیە. ئەم دۆزینەوەیە 14 ساڵی خایاندووە.

چیرۆکی سەرەکی: کۆمەڵێک پزیشکی فەرەنسی جۆرێکی نوێی خوێنی مرۆڤیان دۆزیوەتەوە کە ناوی "گوادا نێگەتیڤ"ـە. ئەم جۆری خوێنە یەک کەس هەیەتی ئەویش ژنێکی خەڵکی دوورگەی گوادلۆپی فەرەنسایە. ئەوەی سەیرە، ئەوەیە کە ئەم دۆزینەوەیە 14 ساڵی خایاندووە.

 چی ڕوویدا: ساڵی 2011 ئەم ژنە بۆ نەشتەرگەرییەک دەچێتە یەکێک لە نەخۆشخانەکان، دوای ئەوەی پشکنینی بۆ دەکەن، دەردەکەوێت خوێنی لەگەڵ هیچ یەک لە گرووپەکانی خوێن یەکناگرێتەوە، پزیشکەکان زۆر بەلایانەوە سەیر دەبێت. پزیشکەکان ساڵانێکی زۆر سەرقاڵی ئاشکراکردنی ئەم نهێنییە بوون، دوای 14 ساڵ لە لێکۆڵینەوە بۆیان دەرکەوت ئەم ژنە خوێنێک لە جەستەیدایە کە لە هیچ مرۆڤێکی دیکەدا نیە.

لەم ڕۆژانە بە فەرمی گرووپی خوێنی ئەم ژنە وەک 48ـەمین سیستمی گرووپی خوێن لەلایەن کۆمەڵەی نێودەوڵەتیی گواستنەوەی خوێن ئای ئێس بی تی ناسێنرا.

ئەوەی پێویستە بیزانیت: ژنەکە ئێستا تەمەنی 54 ساڵە، تا ئێستا نەیزانیوە نە دەتوانێ خوێن بدات و نە دەشتوانێ خوێن وەربگرێ، دەبێ تا ماوە ئاگاداری ڕێژەی خوێنی بێت، چونکە خۆی تاقانەیە و نمونەی دەستناکەوێ.