شاخەوان عەبدوڵڵا: سبەی لە بەغدا کۆبوونەوەیەکی دیکە لەبارەی مووچە دەکرێت

ئاڤا نیوز

جێگری سەرۆکی پەرلەمانی عێراق کە ئەمڕۆ یاوەری سەردانی مەحموود مەشهەدانی بوو بۆ هەولێر دەڵێت، ئامانجی سەردانەکە و کۆبوونەوە لەگەڵ هەر یەک لە سەرۆک بارزانی و سەرۆکی هەرێم و سەرۆکوەزیران، چارەسەرکردنی کێشەی مووچە بوو، دەشڵێت گفتوگۆکان قۆناغی زۆر باشیان بڕیوە و سبەی دووشەممە لەبەغدا کۆبونەوەکان بەردەوام دەبن.

چیرۆکی سەرەکی: هەوڵەكان بۆ چارەسەركردنی ڕیشەیی كێشەی مووچەی مووچەخۆرانی هەرێمی كوردستان چڕبوونەتەوە، ئەمڕۆ سەرۆکی پەرلەمانی عێراق سەردانی هەولێری کرد و لەگەڵ هەریەک لە سەرۆک بارزانی و سەرۆکی هەرێمی کوردستان و سەرۆکوەزیرانی کوردستان کۆبووەوە.

بڵاوکراوەی فەرمی: شاخەوان عەبدوڵڵا، جێگری سەرۆکی پەرلەمانی عێراق بڵاوی کردووەتەوە، چارەسەرکردنی کێشەی مووچەی فەرمانبەرانی هەرێمی کوردستان ئامانجی سەرەکی سەردانی سەرۆکی پەرلەمانی عێراق بوو بۆ هەولێر، لەتەواوی کۆبوونەوەکان لەگەڵ سەرۆک بارزانی و سەرۆکی هەرێم و سەرۆکوەزیرانی کوردستان باسکردن بوو لە چارەسەرکردن و دابینکردنی مووچەی فەرمانبەران بە زووترین کات.

زانیاریی زیاتر: شاخەوان عەبدوڵڵا زیاتر دەڵێت، گفتوگۆکان قۆناغی زۆر باشیان بڕیوە و سبەی دووشەممە لەبەغدا کۆبونەوەکان بەردەوام دەبن بۆ ئەوەی هەردوولا بگەنە رێککەوتن، بە سوپاسەوە لەپێناو چارەسەرکردنی کێشەی مووچەخۆرانی هەرێم، حکومەتی هەرێم و خودی سەرۆکوەزیران مسرور بارزانی زۆر هاوکار بووە، تا ئەو ئاستەی هەندێ جار دەستبەرداری هەندێک مافی یاسایی هەرێمی کوردستان بووە لەو پێناوەدا.

باکگراوند: ئاڤا ئەمڕۆ بڵاوی کردەوە کە سەرۆکوەزیرانی عێراق بەڵێنی داوە ئەم سێشەممەیە لەبارەی ڕێککەوتنی هەولێر و بەغدا لەسەر نەوت و مووچە، وەڵامی حکومەتی کوردستان بداتەوە، بەڵام دیارنییە بە چ شێوازێک دەبێت، لە کۆبوونەوەی ئەنجوومەنی وەزیران دەبێت یان دوای کۆبوونەوە دەبێت.