سوودانی بەڵێنی داوە سێشەممە وەڵامی کۆتایی لەبارەی مووچە بداتەوە

ئاڤا نیوز

بەپێی زانیارییەکانی ئاڤا سەرۆکوەزیرانی عێراق بەڵێنی داوە ڕۆژی سێشەممە لەبارەی ڕێککەوتنی هەولێر و بەغدا لەسەر نەوت و مووچە وەڵامی حکومەتی کوردستان بداتەوە، سەرچاوەیەکیش لە حکومەتی کوردستان ڕەتی دەکاتەوە هەولێر هەموو نەوتی بەرهەمهێنراو ڕادەستی بەغدا بکات.

وێنە گەورەکە: هەوڵەکان بۆ چارەسەرکردنی کێشەکانی نێوان هەولێر و بەغدا بەردەوامن، ناردنی مووچە و هەناردەکردنەوەی نەوتی کوردستان دوو مژاری گرنگ و سەرەکین لە کۆبوونەوەی سێشەممەی ئەم هەفتەیەی ئەنجوومەنی وەزیرانی عێراق یەکلا دەکرێتەوە.

لێدوانی فەرمی: سەرچاوەیەک لە حکومەتی هەرێمی کوردستان بە ئاڤای ڕاگەیاند: هەواڵی ڕادەستکردنی تەواوی نەوتی بەرهەمهێنراوی هەرێمی کوردستان بە بەغدا دوورە لە ڕاستییەوە و ئەسڵ و ئەساسی نییە، حکومەتی هەرێمی کوردستان بەشێک لەو نەوتەی بەرهەمی دەهێنێت بۆ پێداویستی ناوخۆ بەکاری دەهێنێتەوە، بەشێکیشی دەنێرێتە دەرەوە.

ئەوەی پێویستە بیزانیت: هەرێمی کوردستان ئەم هەفتەیە چاوەرێ دەکات، ئەگەر حکومەتی عێراق وەڵامی کۆتایی نەدایەوە و بڕیاری ناردنی مووچەی نەدا و هەر بیانووی گرت، ئەوا حکومەتی کوردستان بژاردەکانی خۆی دەخاتەڕوو.