کۆبوونەوەی یەکلاکەرەوە؛ شاندی تەکنیکی هەولێر و بەغدا پرسی مووچە و هەژماری من و نەوت تاوتوێ دەکەن

ئاڤا نیوز

شاندێکی تەکنیکی هەرێمی کوردستان لە بەغدایە و لەگەڵ هاوتاکانیان پرسی هەژماری من و مووچە و دوایین ئەپدەیتی ڕێککەوتنی نێوانیان تاوتوێ دەکەن. حکومەتی کوردستانیش ڕەتی دەکاتەوە هەولێر هەموو نەوتی بەرهەمهێنراو ڕادەستی بەغدا بکات.

وێنە گەورەکە: هەوڵەكان بۆ چارەسەركردنی ڕیشەیی كێشەی مووچەی مووچەخۆرانی هەرێمی كوردستان چڕ بوونەتەوە، دوێنێ سەرۆکی پەرلەمانی عێراق سەردانی هەولێری کرد و لەگەڵ هەریەک لە سەرۆک بارزانی و سەرۆکی هەرێمی کوردستان و سەرۆکوەزیرانی کوردستان کۆبووەوە.

لێدوانی فەرمی: سەرچاوەیەک لە حکومەتی هەرێمی کوردستان بە ئاڤا میدیای ڕاگەیاند، ئەندامانی شاندە تەکنیکییەکەی کوردستان پێکهاتوون لە کەمال محەممەد، وەزیری سامانە سرووشتییەکان، عەبدولکەریم خەسرۆ، سەرۆکی فەرمانگەی هەماهەنگی و بەدواداچوون و ئامانج ڕەحیم، سکرتێری ئەنجوومەنی وەزیرانی کوردستان، ئێستا لەگەڵ شاندێکی حکومەتی عێراق لە کۆبوونەوەدان، شاندەکەی عێراقیش پێکهاتوون لە بەڕێوەبەری نووسینگەی سوودانی وەک نوێنەری سەرۆکوەزیرانی عێراق و وەزیری نەوتی عێراق و بەڕێوەبەری کۆمپانیای سۆمۆ.

لە کۆبوونەوەکەشدا گفتوگۆ دەکەن لەبارەی ڕەشنووسی ڕێککەوتنەکەی نێوان هەولێر و بەغدا بەتایبەت ئەو بەشەی پەیوەستە بە دەستپێکردنەوەی هەناردەی نەوت و پشکی هەرێمی کوردستان لە نەوت.

زانیاریی زیاتر: بەگوتەی سەرچاوەکەی حکومەتی هەرێم، هەولێر و بەغدا لەپرسی تەوتین و 'هەژماری من'ـدا هیچ گرفتێکیان نییە و ڕێککەوتن کراوە و هەژماری من وەک خۆی دەمێنێت. لەبارەی داهاتی ناوخۆش، هەردوولا ڕێککەوتوون و گرفتێکی ئەوتۆ نەماوە.

ئەوەی گفتوگۆی لەسەر ماوە، پشکی هەرێمی کوردستانە لە نەوت و هەرێمی کوردستان داوای بڕێکی کردووە، بەشێکی بۆ پێداویستی ناوخۆ و بەشێکیشی بۆ کۆمپانیای دانا غاز بۆ بەرهەمهێنانی کارەبا و ئەمەش لەم کۆبوونەوەیەدا گفتوگۆی لەسەر دەکرێت.

زانیاریی تایبەت: بەپێی زانیارییەکانی ئاڤا میدیا، گفتوگۆکانی نێوان هەولێر و بەغدا قۆناغی زۆر باشیان بڕیوە و ئەمڕۆ دووشەممە لەبەغدا کۆبونەوەکان بەردەوام دەبن، لەپێناو گەیشتن بە چارەسەری بنەڕەتی پرسەکە، ئەو دوو شاندە دوایین بۆچوونەکانی نێوان هەردوو حکومەت لەبارەی پرسی مووچە و دەستپێکردنەوەی هەناردەی نەوت تاوتوێ دەکەن و چاوەڕێ دەکرێت لەسەر هەردوو پرسەکە ڕێککەوتنی کۆتایی بکرێت.