ئاڤا زانیاریی نەبیستراو لەبارەی ترسناكترین كێڵگەمینی كوردستان بڵاودەكاتەوە

ئاڤا نیوز

كێڵگەمینی كرۆكە زەرد لە سنووری گوندی پیرۆمەر لە دەڤەری باڵەكایەتی، بە مەترسیدارترین كێڵگەمین لە تێكڕای هەرێمی كوردستان دادەنرێت و تاوەکو ئێستا نزیكەی سێ هەزار مین و سەدان پاشماوەی تەقەمەنیی جەنگی تێدا دۆزراوەتەوە.

وێنە گەورەكە: لە ماوەی ساڵانی هەڵگیرسانی جەنگی هەشت ساڵەی نێوان عێراق و ئێران، ڕووبەرێكی فراوانی ناوچە شاخاوییەكانی هەرێمی كوردستان بە دەیان هەزار مین و تەقەمەنی مینڕێژكراوە، بەهۆیەوە نزیكەی 14 هەزار كەس گیانیان لەدەستداوە و دەیان هەزاری دیكەش برینداربوون. حكومەتی هەرێمی كوردستان بە هاوكاری تیمە بیانییەكانی شارەزا لە هەڵگرتنەوە و پووچەڵكردنەوەی مین و تەقەمەنی، چەندین ساڵە سەرقاڵی پاككردنەوەی كێڵگەمینەكانن.

لێدوانی فەرمی: نیازی خالید ئەرگوشی، جێگری سەرۆكی دەزگای گشتیی كاروباری مین تایبەت بۆ ئاڤا ئاشكرایكرد، ناوچەی 'كرۆكە زەرد' لەسنووری گوندی پیرۆمەری دەڤەری باڵەكایەتی، هەشت كێڵگە مینی لەخۆگرتووە و ڕووبەری سەرجەم كێڵگەمینەكان، ملیۆنێك و 550 هەزار مەتر دووجایە، یەكێك لە كێڵگە مینەكانی ئەو ناوچەیە، بە مەترسیدارترین كێڵگەمین دادەنرێت كە لە ماوەی ساڵانی ڕابردوودا، دووهەزار و 922 مینی جۆراوجۆر و 140 پاشماوەی تەقەمەنیی جەنگی لێ دۆزراوەتەوە.

خاڵە ئەرێنییەکان: ڕووبەری كێڵگەمینە ترسناكەكە 95،200 مەتر دووجایە كە ڕووبەری 91،700 مەتر دووجای لە مین و تەقەمەنی پاككراوەتەوە و بەشێكی كەمی ماوە كێوماڵ بكرێت.

پەیوەست بەم بابەتەوە: لە بەردەوامی پرۆسەی لابردنی مین لە کێڵگەمینی (کرۆکە زەرد) تیمی مینلابەری دەستەی 'DE6'، تەنها لە ڕۆژێكدا 43 مینی دژەکەسییان لەناوبردووە.