تۆمەتی گەندەڵی لە کەیسی ڤاکسینی کۆرۆنا ئاراستەی سەرۆکی کۆمیسیۆنی ئەوروپا دەکرێت

ئاڤا نیوز

بە تۆمەتی تێوەگلان لە کەیسی کڕینی ڤاکسینی کۆرۆنا داوای وەرگرتنەوەی متمانە لە سەرۆکی کۆمیسیۆنی یەکێتی ئەوروپا دەکرێت.

وێنە گەورەکە: دوای ئاشکرابوونی ئاڵوگۆڕی نامەی نێوان ئۆرسوڵا ڤۆن دێرلاین، سەرۆکی کۆمیسیۆنی یەکێتی ئەورووپا و سەرۆکی کۆمپانیایەکی دەرمان بۆ کڕینی بڕێکی زۆر ڤاکسینی کۆرۆنا لە جۆری ڤایزەر و دەستوەردان لە شێوازی دابەشکردنی ڤاکسینەکە، داواکارییەک پێشکەش بە پەرلەمانی ئەوروپا کراوە بۆ وەرگرتنەوەی متمانە لە سەرۆکی کۆمیسیۆنی یەکێتی ئەورووپا.

بڵاوکراوەی فەرمی: ژمارەیەک لە پەرلەمانتارانی ئەوروپی لە ڕێگەی میدیاکانەوە داوایان لە پەرلەمانتارانی ئەوروپا کرد بۆ واژۆکردن لە سەر داواکاری وەرگرتنەوەی متمانە لە  ئۆرسوڵا ڤۆن دێرلاین و بۆ ئەو مەبەستەش پێویستیان بە واژۆی 72 پەرلەمانتار هەبوو، بە پێی ڕاگەیەنراوێک لە پەرلەمانتارانی داواکار لە کۆتاییدا بە واژۆی 74 پەرلەمانتاری ئەوروپی داواکارییەک پێشکەش بە پەرلەمانی ئەوروپا کراوە و داوای دەنگدان لە سەر وەرگرتنەوەی متمانە لە سەرۆکی کۆمیسیۆنی یەکێتی ئەوروپا کرا.

زانیاریی زیاتر: ئەمڕۆ دووشەممە یەکەم گفتووگۆی پەرلەمانی ئەوروپا لەسەر ئەو پرسە بەڕێوەدەچێت و بەپێی خشتەی کارنامەی پەرلەمانی ئەوروپا ڕۆژی پێنجشەممە دەنگدانی کۆتایی لەسەر وەرگرتنەوەی متمانە لە ئۆرسوڵا ڤۆن دێرلاین ئەنجام دەدرێت.