پێشمەرگە ئۆپەراسیۆنێکی بۆ کێوماڵکردنی مۆڵگەکانی داعش ئەنجامدا

ئاڤا نیوز

لیوای 14ـی پیادەی سەر بە وەزارەتی پێشمەرگە ئۆپەراسیۆنێکی کێوماڵکردنی بۆ سەر مۆڵگەکانی داعش ئەنجامدا.

وێنە گەورەکە: دوای دوورخستنەوەی داعش لە سنوورەکانی هەرێمی کوردستان، هێزەکانی پێشمەرگە لە سەرجەم سنووەکان جێگیرکراون، هەندێکجاریش ئۆپەراسیۆن ئەنجامدەدەن بەمەبەستی دابینکردنی ئارامی و ئاسایش بۆ ناوچەکان.

ڕاگەیێنراوی فەرمی: وەزارەتی پێشمەرگە، ڕایگەیاند، هێزەکانی پێشمەرگەی سەر بە لیوای 14ـی پیادەی لە فیرقەی یەکی پیادە، لە سنوری چیای قەرەچوغ ئۆپەراسیۆنێکی کێوماڵکردنی بۆ سەر مۆڵگەکانی داعش ئەنجامدا.

- لە ئۆپەراسیۆنەکەدا، گوندەکانی ئەو سنورە و چیای قەرەچوغ و گەلی تاراوە و مەلا کاغە کێوماڵکران و گەڕان و پشکنین بۆ مۆڵگە و حەشارگەی تیرۆریستانی داعش لەو ناوچانەدا ئەنجامدرا.

- ئەم ئۆپەراسیۆنە لەپێناو نەهێشتنی جموجۆڵی تیرۆریستان و دابینکردنی سەقامگیری زیاتر بۆ خەڵك و گوندەکانی ناوچەکە، ئەنجامدراوە.