ڕێکخراوێکی ژینگەیی: ئەو ئاوەی تورکیا بەری دەداتەوە بەشی پێداویستی ڕاستەقینەی وڵات ناکات

ئاڤا نیوز

ڕوانگەی عێراقی سەوز دەڵێت، ئەو ئاوەی تورکیا بۆ عێراق بەری دەداتەوە تەنیا بۆ ماوەی دوو مانگە و بەشی پێداویستی ڕاستەقینەی وڵاتیش ناکات، بۆیە داوا دەکات بۆ زیادکردنی بەردانەوەی ئاو دووبارە دانووستان لەگەڵ ئەنقەرە بکرێت.

وێنە گەورەکە: عێراق یەکێکە لەو وڵاتانەی بەدەست کەمی ئاوەوە دەناڵێنێت، ڕێکخراوە ژینگەییەکانیش داوا دەکەن سامانی ئاو پارێزگاریی لێبکرێت و بەهەدەردانی بۆ نزمترین ئاست کەمبکرێتەوە.

ڕاگەیێنراوی فەرمی: ڕوانگەی عێراقی سەوز لە ڕاگەیێنراوێکدا ئاماژەی بەوەکردووە، ئەو بڕە ئاوەی کە تورکیا بۆ مانگەکانی تەممووز و ئاب بۆ عێراق بەری دەداتەوە بەشی پێداویستی ڕاستەقینەی وڵات ناکات، ئەوەش مەترسی کارەساتی ژینگەیی و مرۆیی لێدەکرێت ئەگەر پشکی ئەو ئاوە زیاتر نەکرێت.

ئەوەی پێویستە بیزانیت: لە ماوەی چەند ساڵی ڕابردوودا بەهۆی وشکەساڵییەوە زیاتر لە 500 سەر گامێش لە ناوەڕاست و باشووری عێراق لەناوچوون، ئەوەش هەڕەشە و مایەی مەترسییە لەسەر ئاسایشی خۆراک و سامانی ئاژەڵی لە عێراق.

چارەسەرەکان: ڕوانگەی عێراقی سەوز داوا لە حکومەت و لایەنە پەیوەندییدارەکان دەکات دەستبەجێ کەناڵی پەیوەندی و دانوستان لەگەڵ لایەنی تورکی بکەنەوە بە ئامانجی زیادکردنی پشکی ئاوی عێراق و ڕووبەڕووبوونەوەی بە بیابان بوون لە چەند مانگی داهاتوودا، بەتایبەتیش ئەو گفتوگۆیە گرنگتر دەبێت کە دەزانرێت ئەمساڵ، ساڵێکی کەمبارانی بووە و عێراقیش بۆ دابینکردنی ئاو بەشێوەیەکی نیمچە تەواو پشت بە وڵاتانی دراوسێ دەبەستێت.